UEFA reklamon sistemin BFDS, ja si e zbuloi Skënderbeun!

Pas vendimit të KAS-it, UEFA ka reaguar dhe ka përshëndetur këtë vendim, që konfirmon besueshmërinë e komisioneve brenda saj. Në reagimin zyrtar, faqja e UEFA-s, pasi përshëndet vendimin për lënien në fuqi të pezullimit 1-vjeçar të Skënderbeut nga Kupat e Europës, tregon me detaje dhe argumentin kryesor, që solli këtë dënim. Ka qenë një bashkëpunim me “Sportradar”, që ka sjellë identifikimin e disa skemave bastesh, që ishin në kundërshtim me atë çfarë ndodh në tregun normal të basteve.

BFDS – Por më shumë, në reagimin e saj pas KAS-it, UEFA i bënë një reklamë të madhe sistemit që ajo ka instaluar për të zbuluar dhe parandaluar trukimin e ndeshjeve në futboll. BFDS (sistemi i zbulimit të manipulimit të ndeshjeve) është një sistem kompjuterik i UEFA-s, i aplikuar që në vitin 2009, që monitoron  më shumë se 30 mijë ndeshje në vit, ku janë të përfshira dy kategoritë kryesore të çdo vendi, si dhe të gjitha ndeshjet e Kupave të Europës. Detyra e këtij sistemi është të zbulojë lësvizjet anormale të basteve para dhe gjatë ndeshjeve, në tregjet më të madhe të basteve, kryesisht në atë aziatik. Ky ishte edhe sistemi , që konstatoi parregullisitë në ndeshjet e Skënderbeut në Europë dhe në kampionatin shqiptar.