Juventus fitoi dje 3-0 me Bolognan në Torino, për javën e tetë në Serie A. Sfida u vendos nga golat e Kostic, Vlahovic dhe Milik, me Zonjën që shkon në kuotën e 13 pikëve për të mbajtur vendin e shtatë në klasifikim.
Pas ndeshjes, trajneri Allegri ka thënë se Juventus duhet të rikuperojë pikë deri në pauzën e Botërorit, për të qenë në garë për titullin kampion.
“Unë jam realist dhe renditja thotë se kemi 13 pikë. Nëse të tjerët kanë nga 20 apo 17 do të thotë se ne duhet të bëjmë një hap jo vetëm të rëndësishëm, por galoponte nëse duam që të rikthehemi në luftë për titull.
Sigurisht që asgjë nuk është e pamundur, por nëse bëjmë disa hapa të duhur deri në pauzën e Botërorit, njësoj siç rikuperuam edhe në fundvitin e kaluar, ndoshta mund të jemi edhe ne për titull.
Gjithsesi, detyra e Juventusit deri tani është që të rikthehet në lojë edhe për Championsin, duke fituar dy ndeshjet kundër Maçabit, pasi të fitosh të ndihmon të kesh moral.
Milik? E kush e priste të kishte këtë impakt, por më besoni edhe kur them se Rabiot do të bëjë një sezon të madh sivjet”, tha Allegri.
Lexo gjithashtu
