Përfundimi i tre javëve të para të Kampionatit na krijon dhe një tablo të qartë se si do të jetë ecuria e disa skuadrave në këtë sezon. Pavarësisht se është ende shumë shpejt për të dal në konkluzione të sakta dhe konkrete, këto tre ndeshje të zhvilluara nga çdo skuadër na mundëson krijimin e një opinioni të përgjithshëm se për çfarë do luftohet këtë edicion.
Me keqardhje konstatohet se Tirana e rikthyer bujshëm nga Kategoria e Parë, duket se maksimumi që mund të bëjë këtë vit në Superligë është të luftojë për të mos rënë prap andej nga erdhi. Bardheblutë janë treguar mjaft të mefshtë në sfidat e tyre, me humbjet ndaj Kamzës por sidomos ndaj Kukësit që nuk mund të quhen rastësi. Përkundrazi e tillë mund të quhet madje barazimi me Teutën, e cila fare mirë mund ta kishte fituar atë ndeshje në "Selman Stermasi". Në rast se nuk ndryshon diçka konkrete dhe shpejt, ekipi i Ze Maria me shumë gjasa do ta shoh veten në luftën e egër të mbijetesës edhe një vit tjetër.
Partizani vijon të jetë me pritshmëri të larta por të cilat nuk po justifikohen nga fusha e lojës. Të kuqtë nuk po bindin me lojë dhe rezultatet deri diku janë arritur edhe me fat. Titulli me shumë mundësi do të ngelet tabu edhe këtë sezon, me tifozët që do të duhej të ishin të kënaqur edhe me Europën, duke parë rivalët për këtë zonë si Kukësi, Flamurtari, Skënderbeu dhe Laçi. Kujtojmë se Shqipëria mund të nxjerë maksimalisht 4 ekipe në kupat e Europës, dhe kjo në varësi të fituesit të Kupës. Kështu që për Partizanin ky do të ishte objektivi më real dhe i arsyeshëm, të paktën nga ajo e treguar deri tani.
Së fundmi Skënderbeu sërish luan rolin e Skënderbeut. Korçarët po tregohen kompakt në çdo ndeshje sikur të mos kishte ndodhur asgjë nga ato që të gjithë dimë që kanë ndodhur. Kampionët janë edhe për një vit tjetër ekipi për t'u mundur, dhe sfidat me Kukësin dhe Flamurtarin, që këtë vit shihen dhe si rivalët e drejtëpërdrejtë për titullin, do qartësojnë gjithçka në lidhje me këtë gjë.
Kjo deri tani, me ekipet që ndoshta nuk kanë arritur ende gjendjen maksimale fizike, ose ku vapa ka bërë të vetën. Pauza e Kombëtareve do të japë një mundësi të mirë për "rikualidim" për çdo ekip, me përfundimin e fazës së parë në tetor që do na japë një pasqyrë më të plotë dhe bindëse të situatës.
Lexo gjithashtu
