Tirana – Kukësi është kryendeshja e javës së 14-të të Superiores. Klubi bardheblu ende s’e ka bërë zyrtare axhendën, por gjasat janë që ky takim të luhet në stadiumin “Selman Stërmasi”. 24-herë kampionët e vendit kishin bërë kërkesë që kjo sfidë të zhvillohej në “Air Albania Stadium” pasi tapeti i impiantit bardheblu po rregullohej.
Mbjellja e barit të ri detyroi drejtuesit e Tiranës të kërkonin hua stadiumin e ri, mirëpo shtyrja e javës nga Federata Shqiptare e Futbollit i ka dhënë kohën e duhur që të ripërtërihet bari i “Selman Stërmasit”. Ende s’është në kushtet maksimale për të luajtur një ndeshje futbolli, mirëpo deri të shtunën gjithçka pritet të jetë gati për të pritur këtë supersfidë të javës së 14-të. /Newsport.al/
