Teuta gati për hapin e rradhës, durrsakët duan “kokën” e Laçit
Shkruar nga NEWSPORT
Teuta ka mbyllur përgatitjet për ndeshjen e nesërme ndaj Laçit në orën 13:00 në transfertë për javën e 19-të të Abissnet Superiore. Durrsakët nën urdhërat e trajnerit Edi Martini kanë zhvilluar sot pasdite stërvitjen e fundit. Martini ka ideuar formacionin e mundshëm por që pikat mbi “i” do të vihen nesër para ndeshjes.
Teuta po kalon një formë të mirë teksa në tre ndeshjet e fundit kanë marrë 7 pikë dhe vijnë nga suksesi me Partizanin në transfertë. Një fitore e mundshme ndaj Laçit do të katapultonte bregdetarët në renditje teksa nga vendi i nëntë me 21 pikë do të ngjiteshin në të gjashtin me 24 pikë, pikërisht një më shumë se Laçi.