Shqipëri – Zvicër do të jetë një nga përballjet që do të ketë më shumë vëmendje, kjo përsa i përket lojtarëve në fushën e lojës dhe tifozëve që do të kenë pas krahëve apo pas ekranit të televizorit. Pika më e nxehtë, që ngjall edhe shumë debate është përballja mes dy vëllezërve Xhaka, Granitit e Taulantit. I madhi luan për Zvicrën, ndërsa Taulanti i veshur kuqezi. Ndërkohë që në ekipin e granitit ka edhe shumë shqiptarë të tjerë, të cilët përbëjnë bazën e skuadrës.
Në një intervistë për “ilustre.ch”, Taulanti zbulon se për kë bën tifo familja e tij, ndërsa flet pa dorashka dhe thotë se ata janë 150% zviceranë në këtë Europian. Ai e nis me të vëllain, ku shprehet: “Do ta ndal Granitin, madje do t’i shkaktoj edhe faull në mënyrë që ai të mos shënojë. Ai e di që ne jemi profesionistë dhe secili duhet të japë maksimumin për ekipin e tij. Graniti është më emocional se unë. Në familje? Mamaja bën tifo 100% me Zvicrën, ka jetuar prej vitesh dhe i ka dhënë shumë ai vend. Babai është 50 me 50. Pra, në shtëpinë time bëhet tifo 150% me Zvicrën, fakt ky që më jep më shumë forcë që të fitoj me Shqipërinë”.
Koincidenca – “Në vitin 2014 përballë njëri-tjetrit u vunë vëllezërit Boateng, ndërsa unë bisedoja me Granitin dhe thoshim: ‘Si do të jetë nëse do të përballemi?’ Kur shorti na përplasi në Europian, ne i kujtuam këto muabete”.
Debutimi – E kam nisur shkëlqyeshëm me Shqipërinë, pasi fituam kundër Portugalisë. Ndërsa besoj se do të jetë e njëjta gjë edhe në Europian.
Idhulli – “Kristiano Ronaldo. Kam luajtur kundër tij dhe dua të përballem sërish në Europian. Do të ishte fantastike. Jam në të njëjtën skuadër me të në Play Station”.
E ardhmja – “Normalisht që çdo lojtar dëshiron të luajë me një ekip të madh në karrierën e tij. Kam kontratë me Bazelin, por nëse do të vazhdoj nuk do të ishte keq, pasi në kampionat po ecim mirë”.
