Sulmuesi i Laçit Myrto Uzuni me shumë mundësi dje zhvilloi ndeshjen e fundit me fanelën e kurbinasve në sfidën e humbur përballë Skënderbeut për Superkupën. Vetë trajneri Mërgjyshi e pohoi këtë në mënyrë indirekte pas ndeshjes, ndërkohë që për 23-vjeçarin prej kohësh interesohet Lokomotiva e Zagrebit në Kroaci.
Mësohet se kroatët ofruan fillimisht 200 mijë euro, por presidenti i kurbinasve kërkoi një ofertë më të mirë, me drejtuesit e Lokomotivës që pritet tashmë të paguajnë plot 300 mijë euro. Por jo vetëm kaq, pasi Laçi do të mbajë dhe një pjesë të kartonit të Uzunit. Kjo do të thotë se në rast të rishitjes së lojtarit kurbinasit do të përfitojnë sërish një shumë të caktuar.
Uzuni u ble nga Apolonia vitin e shkuar, me Laçin që pagoi rreth 150 mijë euro për shërbimet e tij.