Duhet më shumë se një javë nga derbi i kryeqytetit, megjithatë emocionet kanë nisur të ndihen. Situata duket më pozitive në kampin e kuq që vijnë pas fitores 3-1 me Kukësin, ndërsa Tirana pas humbjes 2-1 me Teutën. Trajneri Giovani Colella do ta ketë grupin e plotë, kurse Orges Shehi ka shumë probleme para kësaj sfide delikate. Si të mos mjaftonin dëmtimet gjatë sezonit, te Tirana nuk do të jenë Florent Hasani, Ardit Hila dhe Behiratche. Teknikut kampion i duhet të improvizojë dhe po pritet me mjaft interes se çfarë do të ndodhë.
Ndërkohë te Partizani optimizmi për titullin kampion është rritur ndjeshëm. Nëse do të arrihet fitorja në atë sfidë që luhet për 3 pikë, por edhe për prestigj, të kuqtë katapultohen në vendin e parë. Italianit i duhet të ndërtojë 11-shen me futbollistët më të mirë, në mënyrë që t’i ruhet ndonjë surprize të mundshme. Precedentët kanë treguar, se në ato ndeshje ku futesh si favoritë janë më të vështira. Faktori kryesor është euforia, ku lojtarët mendojnë se e kanë fituar takimin. Së dyti, presioni që krijohet pas kalimit të minutave dhe faktori i tretë tifozëria e shumtë në shkallët e stadiumit.
Po të kthehemi vite pas në kohë, Partizani dhe Dinamo përplaseshin në “Selman Stërmasi”. Asokohe “Nëndetësja Blu” kishte trajner Ilir Dajën. Data ka qenë saktësisht 17 maj i vitit 2008-të. Dinamo e Dajës mbetet me 9 lojtarë, teksa rezultati ishte 1-1. Gjithçka u konsiderua e përfunduar. Madje Arjan Pisha drejtohej nga trajneri kryeqytetas i dorëzuar: “Profe nuk kemi çfarë të bëjmë. Nuk kemi forca në markim”.
Megjithatë futbolli është sport i paparashikueshëm. Partizani pati shumë raste shënimi, por nuk ia doli të realizonte. Të kuqtë të gjithë në sulm u kapën të papërgatitur në prapavijë. Nertil Ferraj, i futur nga stoli shënoi golin e dytë për Dinamon. Pjesa e mbetur e sfidës ishte histori feste për dinamovitët. Edhe me 9 lojtarë, ku gjithçka u duk e përfunduar, Partizani nuk ia doli të fitonte.
Rastësia ka caktuar që një ndeshje derbi të zhvillohet sërish në 17 maj. Një përballje që do të vendosë shumë për fatin e titullit kampion në kampionatin shqiptar. Tek të kuqtë mund ta kenë marrë lehtshëm për faktin se te bardheblutë ka mungesa të rëndësishme. Megjithatë kujtimet me Dinamon dhe Ilir Dajën, me siguri i shkundin mirë drejtuesit të cilët e dijnë se si mund të humbet një trofe i rëndësishëm në sekondat e fundit. A do të arrijë Partizani të fitojë ndaj Tiranës në 17 majin e këtij viti? Apo historia do të përsëritet njëjtë si 15 vite më parë? Fusha e “Air Albania” do ta tregojë. Le të presim. Spektakli, veçanërisht në shkallët e tribunave do të jetë i garantuar. /Retin TOKA/
Lexo gjithashtu
