Mesa duket Skënderbeu nuk po arrin të gjejë qetësi nga çështjet ligjore, me klubin korçar që krahas pritjes së gjatë për dënimin e UEFA-s , me gjasë së shpejti do të duhet të përballet edhe me një tjetër padi në CAS.
Bëhet fjalë për Prishtinën, presidenti i së cilës është shprehur se së shpejti do të padis disa klube shqiptare për mosrespektim të rregullave të transferimit të lojtarëve. Çështja ka të bëjë me disa lojtarë të blerë nga ekipet shqiptare te ato kosovare, që më pas janë shitur për shuma të konsiderueshme jashtë vendit, por pa paguar te klubet kosovare shumën prej 5% që rregullorja e FIFA-s parashikon për skuadrën që ka formuar futbollistin që po transferohet.
Në këtë mënyrë ndonëse kreu i klubit të Prishtinës nuk ka përmendur emra, sipas informacioneve bëhet fjalë për Agim Zekën dhe Liridon Latifi, të cilët Skënderbeu i mori nga klubi kryeqytetas dhë më pas i shiti jashtë vendit, por mesa duket pa “respektuar” prishtinasit.
“I kemi paditur klubet e papërgjegjshme të cilat i kanë marrë tre-katër lojtarë dhe asnjëherë nuk janë paraqitur në klubin amë, në FC Prishtinë. Paditë kanë të bëjnë ndaj klubeve të Shqipërisë. Besoj se do ta fitojmë të drejtën tonë për disa lojtarë që na u patën rrëmbyer. Klubet e shteteve tjera i kanë kryer obligimet ndaj nesh dhe nuk kemi pasur probleme me to. Ato e kanë respektuar mundin e FC Prishtinës rreth edukimit dhe zhvillimit të futbollistëve që i kanë marrë. Kurse klubet nga Shqipëria kanë pasur sjellje dëshpëruese dhe na kanë detyruar të ndërmarrim masa juridike dhe ligjore. Klubet nga Shqipëria kanë përfituar para të majme ndërsa asnjë falënderim nuk ia kanë shprehur FC Prishtinës e lëre më diçka më shumë”, deklaroi presidenti i Prishtinës Remzi Ejupi për mediat kosovare.
Loading ...
