Kampionët i duan të gjithë dhe kjo bën që drejtuesit e Skënderbeut ta kenë më të lehtë për të gjetur lojtarë, por vështirësia qëndron në faktin e përzgjedhjes së tyre, sepse duhen marrë ata që vërtet i bëjnë punë ekipit për objektivat madhorë që ka. Korçarët mund të konsiderohen mbretërit e merkatos në Shqipëri këto vitet e fundit, jo vetëm për blerjet, por edhe për shitjet. Ndryshe nga shumë klube shqiptare, kuqebardhët kanë nisur nga sezoni i fundit të mbushin arkën me të ardhura që vijnë pikërisht nga shitja e lojtarëve të talentuar jashtë vendit. Kjo praktikë vazhdon dhe në ekipin aktual ka disa lojtarë, të cilët shumë shpejt mund të transferohen në kampionate europiane, me Latifin në krye të listës.
TJETËR SULMUES – Afrimet kanë qenë të shumta edhe këtë verë, duke nisur me trajnerin Agostineli e shumë lojtarë cilësorë, ku veçohen Fukui, Gavazaj, Malaj etj. Dy të tjerë janë gati të firmosin për kampionët e Shqipërisë, braziliani Sergio Antonio Junior dhe italiani Simone Matia, por mësohet se presidenti Takaj ka edhe një goditje tjetër të rëndësishme, ndoshta të fundit për këtë verë. Dhe çuditërisht bëhet fjalë për një sulmues, edhe pse ata janë të shumtë aktualisht në ekip. Për momentin, e vetmja gjë që dihet, është se ai do të vijë nga jashtë, pra është i huaj dhe patjetër që do të jetë e një kualiteti të lartë. Emrin do ta zbulojë së shpejti vetë drejtuesi më i lartë i klubit korçar.
Lexo gjithashtu
