Tirana po kalon një moment të “errët” në kampionat, teksa prej 3 javësh nuk e njeh shijen e fitores. Rezultate këto që kanë detyruar bardheblutë të humbasin terren në klasifikim, pasi aktualisht mbajnë vendin e 4-të me 14 pikë pas 10 javësh.
Por jo vetëm kaq, pasi prej javësh kryeqytetasit janë në emergjencë për shkak të dëmtimeve. Disa lojtarë titullarë vazhdojnë rikuperimin e tyre, ndërsa shërbimet e tyre nuk llogariten nga stafi teknik në ndeshje të rëndësishme të skuadrës.
Megjithatë duket se ka dhe lajme të mira për bardheblutë. Filip Najdovski i cili mori një dëmtim ndaj Egnatias dhe për disa ditë ka çaluar është rikthyer të stërvitet me pjesën tjetër të skuadrës. Padiksutim diçka e tillë bën me “krahë” Julian Ahmatajn, i cili mund ta përdorë në sfidën e ardhshme me Teutën në kampionat.
Gjithsesi gjendja e tij mbetet për t’u parë dhe do të jetë stafi mjekësor i kryeqytetasve që do të thotë fjalën e fundit për mbrojtësin. Gjithashtu kujtojmë se vazhdojnë rikuperimin Gentian Selmani, dhe Mustafa Abdullahu, ndërsa Latifi e Lulaj nuk ia dalin as këtë javë të jenë të gatshëm për Tiranën.
Lexo gjithashtu
