Ish kryeministri italian dhe ish presidenti i Milanit, Silvio Berlusconi ka folur me zë të dridhur rreth situatës që po kalon skuadra e tij e zemrës.
Gjatë një interviste për "Premier Sport", ka ritheksuar për të disatën herë se me skemën me një sulmues të vetëm nuk mund të shkohet askund.
"I kam parë ndeshjet e fundit të Milanit. I uroj gjithë të mirat Rino Gattusos, por duhet të ndryshojë skemë", këshillon ndër të tjera ish-padroni i klubit kuqezi.
"Zgjidhja ideale do të ishte që Milani të luante me dy sulmues dhe me Bonaventurën prapa krahëve të tyre. Kjo, sepse Suso dhe Bonaventura, i cili nuk është edhe aq inferior krahasuar me Kakà, janë dy superfutbollistët që kemi ne aktualisht, së bashku me Donnarummën", vijon më tej Berlusconi në rolin "e trajnerit", gjë që e ka bërë edhe më parë kur e drejtonte vet klubin e Milanit.
"Ndiej një dhimbje të madhe, vuaj aq shumë saqë shpesh nuk arrij ta çoj deri në fund një ndeshje të Milanit. Më lëndon teksa shoh Milanin të luajë me një skemë të lexueshme dhe të dështuar.
Nuk jam dakord me ardhjen e disa lojtarëve, por mbi të gjitha nuk më pëlqen skema e lojës. Duhet të kthehemi tek ajo me të cilën kemi fituar shumë në të kaluarën. Duhen dy sulmues, njëri prej të cilëve të jetë Suso, ndërsa Bonaventura të luajë si fantazist prapa tyre, duke pasur mundësi edhe të godasë portën. Jack nuk është edhe aq prapa brazilianit Kakà. Megjithatë, Gattusos i uroj fat", përfundoi ish numri një i klubit kuqezi.
Lexo gjithashtu
