Ndeshja – Vetëm një gabim i portierit Etrit Berisha në minutën e 5 të ndeshjes dhe Zvicra grumbullon tri pikët e para në Grupin A. Kështu, kuqezinjtë e nisin këtë aventurë me humbje, por që nuk e meritonin për lojën dhe shpirtin e garës. Sa iu përket rasteve, ato folën për kuqezinjtë, të cilët me Sadikun më së shumti dhe me Gashin iu afruan kuadratit, por vëmendja ndoshta dhe fati nuk ishte me ne. Goli u shënua nga Schar në minutën e 5, ndërsa dalja e Canës me karton të kuq në minutën e 36, këto janë dy momentet që vendosën këtë sfidë.
Shqipëri – Zvicër 0-1
Shënues: Schar 5′
Formacionet
Shqipëria: Berisha, Hysaj, Cana, Mavraj, Agolli, T.Xhaka (Kaçe 62′), Kukeli, Abrashi, Roshi (Cikalleshi 74′), Lenjani, Sadiku (Gashi 81′). Trajner: Xhani De Biazi
Skema: 4-1-4-1
Zvicra: Sommer, Djorou, Rodriguez, Schar, Lichtsteiner, G.Xhaka, Xhemaili (Frei 75′), Behrami, Shaqiri, Mehmedi (Embolo 62′), Seferovic. Trajner: Vladimir Petkovic
Skema: 4-2-3-1
Gjyqtarë: C.Velasco, R.Alonso, J.Yuste
Kartonë të verdhë: Cana 23′, 36′, Kaçe 64′ , Kukeli 88′, Mavraj 90′ / Schar 13′, Behrami 66′
Karton të kuq: Cana 36′
Stadiumi: “Bollaert Delelis” Lens
Pjesa e Parë – Zvicra e nis me vrull lojën, duke krijuar presion të vazhdueshëm në portën e Shqipërisë. Ndërsa në minutën e 2 është pranë shënimit me Shaqirin. Por, atë që nuk e bën Shaqiri, arrin ta bëjë Schar në minutën e 5. Helvetët kalojnë në avantazh. Por, pas shënimit të golit të besuarit e trajnerit Petkovic bëjnë lojë të mirë dhe agresive, ndërsa i afrohen disa herë golit të dytë, sidomos me shqiptarët që kanë në përbërje. Pas minutës së 15 të ndeshjes, janë kuqezinjtë që arrijnë të ndryshojnë kurbën e zhvillimit të ndeshjes. Taulant Xhaka ka mundësi që të kalojë skuadrën tonë në avantazh, sidomos në minutën e 24-t, kur gjuan ngjitur me traun e portës. Rasti më i pastër për shënim është ai i Sadikut në minutën e 31, kur elbasanasi del i vetëm me Sommer dhe këmba e këtij të fundit e largon sferën. Por, më parë sulmuesi kuqezi ishte kapir në pozicion jashtë loje. Presioni i tanëve sa vjen dhe rritet, ku nga minuta në minurë ofensiva ka marrë kontrollin e lojës dhe goli është shumë pranë. Ndërsa në minutën e 34-t është Odise Roshi që merr krahun dhe kërkon të japë asist në zonë, por ndërhyrja e portierit është vendimtare.
Por, ajo që askush nuk e kishte menduar, ndodhi, Lorik Cana ndëshkohet me kartonin e dytë të verdhë brenda 36 minutave lojë, duke lënë skuadrën me një lojtar më pak. Menjëherë pas kësaj tekniku De Biazi nxjerr në nxemje disa lojtarë të stolit, ndërsa detyrohet të japë direktiva për të ndryshuar skemën në mbrojtje. Megjithatë, Zvicra i afrohet golin me Mehmedin.
Pjesa e dytë – Fraksioni i dytë i lojës nis pa ndryshime për kampet respektive. Ndërsa trajneri De Biazi hedh në nxemje Kaçen, Veselin dhe Lila. Por, duke qenë se jemi me një lojtar më pak, zviceranë e kanë më të lehtë të dalin në sulm, duke na rrezikuar disa herë. Në minutën e 50 me një top në versionin “parashutë” është kapiteni i skuadrës sonë, Elseid Hysaj, i jep një asist Armando Sadikut, i cili në fund nuk arrin që ta dërgojë dot në rrjetë. Kundërsulmi i Zvicrës nuk vonon dhe vjen në minutën e 53, ku Seferovic shkarkon një gjuajtje potente, por Berisha tregohet pozicional dhe e pret. Në minutat në vijim rastet janë të njëpasnjëshme nga kuqezinjtë, të cilët edhe pse me një lojtar më pak arrijnë që të vënën në vështirësi zviceranët. Kundërpërgjigja e helvetëve vjen në minutën e 66, ku Seferovic del i vetëm përball Etrit Berishës, por shtatlarti i portës kuqezi nuk mund të gabojë dy herë në një ndeshje, duke ia larguar topin nga këmbët sulmuesit kryesor të Zvicrës.
https://www.youtube.com/watch?v=nhE_dUPtZzo
Rastet e kuqezinjve regjistrohen me Sadikun, i cili në minutën e 77 merr një asist sërish nga Hysaj, por gjuan në rrjetën e jashtme. Pak sekonda më vonë Seferovic përfiton nga gabimet e mesfushës së Shqipërisë dhe del përballë Berishës, por pa mundur që ta kalojë sferën në rrjetë dhe kërkon 11-metërsh, por gjyqtari e sqaron se nuk ishte faull për të. Më pas është sërish Shaqiri që del i vetëm përballë Berishës dhe sërish portieri tregohet vendimtar duke i bllokuar rrezen e veprimit e si për pasojë edhe topin, i cili mbetet në duart e tij. Më pas De Biazi heq nga loja Sadikun dhe i jep
hapësirë Gashit, i cili shihet si shpresë për sulmin kuqezi, por mungesa e një lojtari në fushë bën që Shqipëria të ketë probleme me prapavijën. Megjithatë në kundërsulm luajnë të sigurt, në minutën e 86 Kaçe nuk arrin të shënojë me kokë, ndërsa në minutën e 87 është Gashi që del i vetëm përballë portës së helvetëve, gjuan dhe portieri Sommer grushton duke e dërguar topin në këndore.
