Kukësi ka arritur të marrë një fitore të pastër në Kupë ndaj Lushnjes 3-0. Shpëtim Duro bëri rotacion në formacion për sfidën e djeshme dhe megjithatë rezultati dhe fitorja nuk u disktuan për asnjë moment. Verilindorët dominuan ndeshjen dhe futbollistët e aktivizuar kënaqën teknikun e tyre me paraqitjet e bëra.
Afrimi i merkatos së dimrit, Gudberg Cooper ishte një nga futbollistët që shkëlqeu në ndeshjen e djeshme. Sulmuesi ganez arriti të shënonte dy gola në debutimin e tij duke e nisur me këmbën e duhur aventurën me Kukësin. Nga ana tjetër Eduard Rroca kishte vëmendjen e veçantë të teknikut Duro, pasi mesfushori vjen nga një dëmtim i rëndë. Fantazisti i Kukësit bëri një paraqitje të mirë gjithashtu, duke gjetur dhe rrjetën në minutën e 46 të takimit.
Tashmë ekipi i Kukësit do të përballet në fundjavë në ndeshjen e vështirë ndaj Bylisit. Verilindorët mbeten të favorizuar, pasi ballshiotët nuk patën luksin të bënin një rotacion në Kupë ndaj Laçit, ndërsa Kukësi pritet të jetë më i freskët.
Lexo gjithashtu
