“Shpërthen” Rudi Vata akuzon rëndë Skënderbeun dhe Takajn

Rudi Vata, ish-kapiteni i Kombëtares dhe ish-lojtar i shquar i Vllaznisë dhe Dinamos ka hedhur akuza të forta ndaj presidentit të Skënderbeut në një intervistë të dhënë sot për “Panorama Sport”. Ai e ka cilësuar matrapaz presidentin Ardjan Takaj, ndërsa thotë se ky nuk është dënimi real për Skënderbeun.

Ardjan Takaj, presidenti i Skënderbeut

Dënimi – “Për mua ka qenë dënim shumë i butë. Përderisa është vërtetuar që pjesëtarët e klubit të Skënderbeut kanë bërë veprime të tilla, atëherë gjykoj se është falur. Duhet të ishte një vendim më i ashpër për ta bërë këtë klub shembull natyrisht dhe personat që e drejtojnë sepse e kanë degjeneruar futbollin shqiptar”.

Reagimi i Skënderbeut – “Për kë po flisni, për ata që dalin në studio televizive dhe flasin si gjeni të futbollit, sikur na kanë bërë shpikje? Është e vërtetë që këta njerëz për 20 vjet kanë bërë shpikje për t’i çmendur njerëzit nga mendja, duke manipuluar ndeshjet. Kjo është e vërteta e hidhur me klubin e Skënderbeut, prandaj e theksoj se është dënuar pak. Korçarët e ndershëm e dinë shumë mirë, ndërsa për ata që nuk e kuptojnë , ndiej keqardhje. Shpresoj që pas kësaj që ndodhi të zënë mend ata të tjerët, që janë në rrugën e Skënderbeut. Futbolli luhet në fushë, jo në tavolinë, ashtu siç janë konsumuar disa shqiptarë në 20 vitet e fundit. Kjo është rruga më e pandershme për t’u bërë i pasur në kurriz të futbollit. Ne, që kemi derdhur djersë për futbollin, duke sakrifikuar për shumë vite me lojë të ndershme dhe duke thyer këmbë e duar, për përballemi me këta njerëz, na thonë: Kush je ti që më gjykon mua?”

Referimi – “Vetë president i Skënderbeut, matrapazi i futbollit shqiptar. Dhe kujt ia ka thënë, mua që kam lënë nënë e babë për futbollin. Tradhti më të madhe se i ka bërë Skënderbeu qytetit të Korçës, nuk ka.Tani, ky matrapaz i futbollit ta gëzojë dënimin dhe të hedhë miliona të tjerë që i ka bërë me politikë. Me këta njerëz, futbolli shqiptar kurrë nuk ka për të ecur përpara”.