Tirana luajti dje kundër Vllaznisë, ndeshje që përfundoi me rezultatin 1-0 në favor të bardhebluve. Sfida ishte e ekuilibruar, megjithatë në fund bardheblutë iu falën golit të shënuar nga Idi Batha. Në “Selman Stërmasi” pati një moment për moviolë. Taulant Seferi arriti të realizonte në minutën e 65-të. Asist i Elton Cale-së për sulmuesin kuqezi i cili nuk gaboi përballë Zogoviç. Megjithatë arbitri anësor gaboi duke e konsideruar lojtarin e Tiranës në pozicion jashtë loje.
Pamjet filmike tregojnë krejt të kundërtën. Seferi ishte në lojë dhe pozicioni i tij ishte mjaft i dukshëm. Siç duket arbitrat e Superiores nuk janë mësuar me shpejtësinë e lojtarëve të tillë të cilët arrijnë të shkëputen bukur pas mbrojtjes kundërshtare. Shpesh herë virojtësit bëhen protagonistë me vendimet e tyre. Dhe justifikimet në panelet e ndryshme janë: “Ishte rast i vështirë”. Mund të kenë të drejtë, por momentet e “lehta” edhe një amator që sheh futboll
do të arrinte të jepte vendimin e drejtë. Ndaj këta gjyqtarë kalojnë disa shkallë për t’u vendosur në gjykimin e majës së futbollit shqiptar. Nëse Batha nuk do të kishte shënuar, atëherë rezultati i takimit do të ishte shumë i diskutuar.
6 javë drejt fundit të Superiores, në Sektorin e Gjykimit të Federatës Shqiptare të Futbollit duhet një dorë e fortë për t’i shkundur këta gjyqtarë që mund të vendosen fatet e sezonit. Në të kundërt, le të hiqen arbitrat dhe lojtarët do të arrijnë të kenë sensin e kompromisit me njëri-tjetrin më mirë se vendimet e tyre, sikurse ndodh në një ndeshje miqësore mes shokësh në kalçeto. Fundja, askujt nuk i hyjnë në punë gjyqtarët që tallen me djersën e lojtarëve apo me investimet e drejtuesve të klubeve. /Newsport.al/
Loading ...
