Shkodran Mustafi është kthyer në armikun kryesor të tifozëve të Arsenalit këtë sezon, por ai u shënjestrua dhe nga ish-kapiteni i Liverpoolit Jamie Carragher. Ish-futbollisti anglez e kritikoi paraqitjen e 27-vjeçarit ndaj Crystal Palace si një "shfaqje horrori".
"Nuk u befasova nga ajo që pashë, ishte një shfaqje horror, që e kemi parë edhe më përpara. Ai ka qenë një kaos total që kur u bashkua me Arsenalin dhe ndeshja e fundit ishte një tjetër shembull perfekt. Edhe në golin e dytë gaboi, përveç gafës te goli i parë", u shpreh 41-vjeçari për median prestigjioze "Sky Sports".
Megjithatë, trajneri i Arsenalit Unai Emery e mori në mbrojtje futbollistin e kombëtares së Gjermanisë duke argumentuar se dështimet e "Topçinjve" nuk vijnë nga individët, por nga loja në grup.
"Do të mbroj çdo futbollist, sepse ata punuan dhe dhanë gjithçka. Mund të flasim për skuadrën në përgjithësi, por nuk mund të përqendrohemi tek emra të veçantë", theksoi tekniku spanjoll.
Tifozët e Arsenalit nisën një fushatë për ta dënuar me "burgim të përjetshëm" pas paraqitjeve të dobëta që ka bërë këtë sezon me londinezët. Në këtë klimë të krijuar, Mustafi mund të ndryshojë ekip në fund të sezonit dhe ka marrë oferta nga Gjermania e Italia.
Lexo gjithashtu
