Portieri i Hungarisë, Gabor Kirali, është 40 vjeç dhe në karrierën e tij ka luajtur me shumë skuadra në Gjermani apo Angli, por ai është bërë i njohur nga veshja e tij. Të gjithë e njohin si “njeriu pizhame”, për shkak të tutave të gjata dhe gri që mban gjithmonë gjatë ndeshjeve, ndryshe nga kolegët e tij. “Unë jam një portier dhe jo një model. Në thelb është çështje rehati dhe komoditeti, e rëndësishme është që të arrihet rezultati. Gjithmonë kam mbajtur veshje një numër më të madh për të lëvizur lirshëm. E kam provuar me të shkurtra në Angli dhe në Gjermani, por nuk ka qenë e përshtashme për mua. Jam mësuar kështu, pasi kam luajtur edhe në baltë apo në të ftohtë. Po ashtu, edhe mosha nuk është problem për mua”, – ka thënë portiere hungarez, i vlerësuar nga gjithë kolegët për besimin që transmeton në skuadër.
