Renato Arapi sfidon median, ja e vërteta e tij te Partizani

Renato Arapi është futbollisti që u afrua tek të kuqtë në merkaton verore. Para disa ditësh u përfol që mbrojtësi i kuq nuk ishte i kënaqur në skuadrën e “demave”. Por ai ditën e sotme e ka hedhur poshtë këtë, teksa ka thënë që te Partizani ai ka ardhur me dëshirë, dhe ka qenë këmbëngulja e tij për të qenë pjesë e të kuqve në vijim. 29- vjeçari është shprehur i lumtur që është pjesë e organikës së Sormanit dhe ka premtuar që do të japë më të mirën për këtë skuadër.

“Jam afruar me dëshirë të plotë tek Partizani dhe kam insistuar edhe vetë personalisht që të jem pjesë e të kuqve. Jam shkëputur nga Skënderbeu ku natyrisht kam kaluar 6 sezone dhe nuk janë pak, por më tundon aventura e re dhe dua të bëj maksimumin për këtë klub legjendar dhe të kontribuoj në arritjen e objektivave që i kanë vendosur vetes. Ndërrimi i ambientit për çdo futbollist nuk është i lehtë, aq më tepër kur t’i ke kaluar 6 vite me një tjetër ekip. Jam në një fazë ambientimi dhe kam gjetur njerëz që po më ndihmojnë. Kam marrëdhënie të mira me të gjithë dhe i falënderoj që po ma bëjnë punën më të lehtë. Partizani është një ekip i madh dhe me një fanellë që peshon. Kemi shumë detyrime ndaj tifozerisë dhe normalisht që po punoj që të përshtatem dhe të ndërthurëm sa më shpejt edhe me shokët e skuadrës. Në ndeshjet ndaj Slovan Bratislava dhe Ferencvaros kam luajtur në qender,nuk është hera e parë që luaj në qendër të mbrojtjes, pasi e kam bërë edhe në kombëtare edhe te Skënderbeu kur ekipi ka pasur nevojë. Mundohem të jap më të mirën aty ku skuadra ka nevojë për mua dhe ku më cakton trajneri që të luajë. Të gjithë më kanë shprehur besimin e madh te unë dhe më kanë thënë fjalët më të mira për ndeshjet e para me fanellën e të kuqve. Tani po mundohem të nxjerrë më të mirën nga vetja që të ia dalim mbanë për ndeshjen e kthimit në Hungari” ka deklaruar qendërmbrojtësi për faqen zyrtare të Partizanit.