Keqardhja e humbjes me Francën po ia lë vendin sfidës me Rumaninë, ku Shqipëria synon të shënojë golin e parë në një Europian dhe të marrë 3 pikët, që i japin shpresa për t’u kualifikuar si vend i tretë. “Panorama Sport” sjell mendimet e disa specialistëve të njohur të futbollit shqiptar dhe ish-trajnerëved për ndeshjen e fundit në grup.
Neptun Bajko, ish-trajneri i Kombëtares, mendon se zgjidhja do të vijë nga mesfusha: “Duhet të ndryshojmë mënyrën e lojës për të shkuar te rezultati. Rumania kam shumë pak të meta, me aq sa kam parë, por them se lojtarët e mesfushës do ta zgjidhin ndeshjen. Mbrojtja gaboi pak me dyshen Mavraj-Ajeti”, – thotë Bajko.
Astrit Hafizi, edhe ky një ish-trajner i kuqezinjve, thekson se trajneri De Biazi duhet të bëjë ndryshime në formacion, pasi lojtarët do të jenë të lodhur: “Me Francën u sforcuam shumë dhe nuk duhet të biem në eufori nga loja e mirë që bëmë. Ndeshjen me Rumaninë do ta fitojë skuadra më e freskët fizikisht, ndaj them se duhen bërë ndryshime”, – shprehet Hafizi.
Sulejman Demollari është ai që e njeh mirë futbollin rumun dhe kombëtaren. Sipas legjendës dinamovite, skuadra jonë vuan shumë psikologjikisht, ndërsa mbrojtja nuk duhet lëvizur: “Bëmë një ndeshje shumë të mirë me Francën, që u vendos në fund, pasi mbrojtja humbi përqendrimin. Mendoj se ky repart ishte mirë dhe nuk duhet lëvizur, ndërsa stafi teknik duhet të punojë për të përmirësuar gjendjen psikologjike të lojtarëve”, – gjykon Demollari.
Sulejman Starova, specialist i njohur, ka një tjetër ide, ai kërkon Cikalleshin titullar: “Cana duhet të kthehet titullar, ndërsa Memushaj duhet të jetë më i avancuar përpara, në mbështetje të Cikalleshit. Them Cikalleshit, sepse është më i freskët fizikisht. Po ashtu, trajneri duhet të ketë një plan B”, – mendon Starova.
