Bylis ka qenë ndër vite një nga klubet e kampionatit shqiptar që arrinte të afronte në organikë lojtarë të huaj cilësorë. Vlen të përmendet Peter Olayinka, futbollisti i parë që u shit nga Skënderbeu për shifrën e 1.1 milionë eurove. Fillimet e tij ai i kishte në Ballsh, ndërsa më vonë e blenë korçarët.
Siç duket historia përsëritet sërish te mallakastriotët, por këtë radhë me Aires Souza. Portugezi ka mbërritur prej 3 ditësh në Shqipëri, ndërsa ditën e djeshme arriti të realizonte në miqësoren kundër Skënderbeut përfunduar me rezultatin 2-1 në favor të korçarëve. 23-vjeçari luan si sulmues anësor dhe menjëherë ka lënë përshtypje pozitive te trajneri Jeton Beqiri.
Ky i fundit e ka aktivizuar në testin e djeshëm si titullar. Përgjatë gjithë takimit, ai ishte rrezik konstant për kundërshtarin dhe në minutën e 27-të mposhti me kokë portierin Ruçi. Tashmë pritet të shihet vazhdimësia e tij, teksa sinjalet e para kanë qenë mjaft pozitive.
