Dita e sotme është një ditë jo si të tjerat në kampin e klubit të Erzenit. Largimi i trajnerit Xhevahir Kapllani 3 javë para fundit bëri që stoli i shijakasve të kërkojë një zëvëndësues. Në media u aludua për teknikun turk, Voklan Demirel, i cili ishte i pranishëm në stadiumin “Niko Dovana” duke ndjekur ndeshjen ndaj Bylisit.
Në një prononcim për Newsport.al, është vetë drejtori i përgjithshëm i klubit Erzeni, Ervis Xhafa, i cili zbulon arsyen e vërtetë të vizitës së tij në Shqipëri. Xhafa zbulon se Demirel ishte duke vëzhguar talentin Adnard Mehmeti dhe për të vlerësuar 2 lojtarë të tjerë.
“Volkan Demirel ishte I pranishëm në ndeshjen Erzeni – Bylis për të ndjekur nga afër lojtarin e Erzenit Adnard Mehmeti, I cili është kërkuar edhe nga disa klube Europiane.
Gjatë vizitës së tyre, Demirel me stafin e tij drekuan me presidentin e Erzenit z.Durim Keci ku biseduan në lidhje me bashkëpunimin midis dy klubeve dhe nga të dy akademitë përkatëse. Demirel ishte me dy bashkëpunetor të tij ku dha vlerësime edhe për dy lojtarë të tjerë”, sqaron drejtori Xhafa.
