Dy barazime dhe një humbje në tre ndeshjet e fundit, Luftëtari nuk arrin të imponohet me lojën e bukur dhe rezultate gjatë tre javëve të fundit edhe pse vazhdon të mbajë vendin e katërt në klasifikimin e përgjithshëm.
Shefi i klubit gjirokastrit, Gentian Nora, në një intervistë ekskluzive për Supersport, ndalet gjatë te momenti i skuadrës nga Qyteti i Gurtë, duke komentuar rezultatet e fundit por edhe situatën aspak koode të sulmit bluzi që ka nisur të tregojë limitet edhe pse mbetet një nga repartet më produktivë të Kategorisë Superiore.
Fillimisht ai ndalet te zërat mediatikë të ditëve të fundit që aludojnë për marrëveshje mes klubit dhe Korabit sipas të cilëve, Luftëtari dhuroi 10 milionë lekë për barazimin që dibranët arritën t’i shkëpusnin Tiranës.
Sipas tij, akuzat në drejtim të buzinjve janë të pabaza dhe nuk kërkojnë koment.
Skuadra e Milinkoviç nuk arrin të shfaqet e kthjellët në fushën e lojës dhe këtë e tregojnë rezultatet, por numri 1 i klubit thekson se skuadra tashmë duhet të mësohet me faktin që kundërshtarët nuk e konsiderojnë më surprizë.
Për Norën, detyrim mbetet mbijetesa por vendi i katërt është gjithashtu një objektiv, aq më tepër që skuadra momentalisht mban këtë pozicion, ndërsa ai siguron se emrat që e ringritën emrin e kësaj skuadre do mund të vazhdojnë të jenë pjesë e projektit të klubit edhe gjatë sezonit të ardhshëm, por kjo do të vendset nga ofertat që pritet të vijnë në adresë të klubit.
Lexo gjithashtu
