Në një rrëfim ekskluziv për newsport.al, Bledi Shkëmbi ka rrëfyer ditët e para si trajner i Lirisë së Prizrenit, planet për të ardhmen dhe si vendosi të bëntë këtë zgjedhje. Për momentin ish kapiteni i Skënderbeut ndodhet në Ohër me skuadrën e tij, aty ku do të zhvilloj fazën përgatitore para se të nisë zyrtarisht aventurën si trajner në Superligën e Kosovës.
Pasi latë futbollin qëndruat një vit pushim duke u angazhuar në Supersport si analist futbolli. Përse vendosët që të ndiqnit ndërkohë dhe kurset për trajner?
Në vitet e fundit që luaja akoma futboll gjithmonë kisha dëshirë dhe mendimin që kur t’a lija futbollin të bëhesha trajner. Sa lash futbollin mora ofertë nga SuperSport e prita me kënaqësi dhe dëshirë. Tani e them me bindje që ajo eksperiencë më ka ndihmuar shumë pasi nga ai moment mundohesha t’i shikoja ndeshjet me një shikim më profesional.
Cili ka qenë trajneri juaj i parë dhe trajneri që ju ka lënë më shumë mbresa në karrierë?
Trajneri i parë ka qenë ai i klasës sportive Zeni Çela, por gjatë karrierës kam ndërruar shumë trajner dhe mendoj që secili ka bërë punën e tij në rritjen time si futbollist por jo vetem. Zlatko Kranjcar ka qenë ai që më ka lënë më shumë përshtypje për mënyrën e stërvitjes por dhe sjelljes me futbollistët.
Cili është modeli juaj i trajnimit në arenën ndërkombëtare?
Model ndoshta nuk mund të them por më pëlqen Ançeloti shumë. Nuk diskutohet që do të zgjidhja dhe një miks nga Guardiola dhe Simeone.
Si erdhi opsioni Prizren? Si i njohët drejtuesit dhe a e kishit menduar më parë të bënit trajnerin në Ligën e Kosovës?
Në fakt kisha filluar të merrja sinjale dhe nga klube në Shqipëri dhe po mendohesha seriozisht a jam gati apo jo?! Dëshira për të punuar ishte shumë e madhe dhe me ngacmonte shumë fakti që të filloja të stervisja ekip. Me Lirine ishte shumë rastësore. Një miku im i mirë më thotë që Liria e Prizrenit kërkon trajner dhe propozova emrin tënd. Në fakt nuk e mendoja që të filloja karrierën direkt në Kosovë. Bëra disa udhëtime në Zvicër dhe Prizren për t’u njohur nga afër me drejtusit e klubit dhe vendosa të pranoj ofertën. Pash që ishin njerëz me ambicje dhe shum seriozë.
Çfarë përfaqëson Liria në Kosovë dhe çfarë objektivash ka këtë sezon?
Me sa kam mësuar Liria është një ekip me shumë traditë në Kosovë por që vitet e fundit nuk është aty ku e ka emrin. Synimi jonë është t’i kthejm emrin e mirë që ka në Kosovë ky klub dhe të jemi një ekip shumë konkurues me të gjithë kundërshtarët.
Ju keni marre disa lojtare nga Shqiperia. Si eshte futbolli ne Kosove dhe ne cfare gjendje jane lojtaret?
Kur pash ekipin nga afer pash që ekipi ishte shumë i ri dhe patjetër na duheshin disa lojtarë me eksperiencë dhe mendoj që me futbollistët e afruar ja kemi arritur qëllimit që ne mendonim. Këta lojtarë do na ndihmojnë në fushë por edhe jashtë saj me eksperiencën e tyre pasi janë emra të një niveli shumë të mirë.
Këtë vit duket se Liga e Kosovës është forcuar ndjeshëm. Sa i njihni rivalët tuaj?
Është e vërtetë që po forcohet Liga e Kosovës dhe me vjen mirë për këtë pasi është në të mirë të të gjithëve. Për rivalët po mundohem të marr informacion por mendoj që kam kohë pasi si fillim duhet të pregatis ekipin tim.
A do vazhdoni të bëni merkato apo do ta mbyllni me kaq?
Mendoj qe ekipi u kompletua. Ndoshta mund të ketë ndonjë goditje të fundit. Ndoshta…
Nëse do luante në Superiore sot skuadra e Lirisë, çfarë vendi do zinte?
Është e vështirë të thuash çfarë vendi por mendoj që kemi një ekip që të gjithë do të na respektonin shumë.
Intervistoi: RETIN TOKA
Lexo gjithashtu
