Situatë e nderë te Skënderbeu. Dy ditë para takimit kundër Tiranës, ku korçarët barazuan 2-2, Hamdi Salihi dhe trajneri Ilir Daja kanë pasur një debat të ashpër mes tyre. Arsyeja e këtij sherri mes palëve nuk dihet ende, ndërsa “Sport Ekspres” raporton se pas këtij episodi trajneri ka kërkuar një mbledhje urgjente me skuadrën.
Tonet kanë qenë të ashpra edhe në mbledhjen që supozohej të pajtonte palët, por të paktën mes Salihit dhe Dajës është arritur “paqja” duke shuar të paktën nervozizmin mes tyre.
Një tjetër çështje te kampionët duket se është edhe Tefik Osmani. Mbrojtësi korçar mësoi një ditë para se nuk do të ishte pjesë e formacionit kundër Tiranës. Ditën e ndeshjes, Osmani ka telefonuar madje edhe presidentin Ardjan Takaj, ndërsa qendërmbrojtësi ka qenë shumë i zemëruar. Presidenti i Skënderbeut është munduar të qetësojë lojtarin duke i kërkuar të bëjë durim, për të mos prishur atmosferën në ekip. Tefik Osmani nuk luajti asnjë minutë ndaj Tiranës.