Disiplina shihet si arma më e fortë e teknikut të kombëtares Christian Panucci, i cili nuk fal askënd. Rasti më i fundit është i me portierin e talentuar të Lazios, Thomas Strakosha.
23 vjeçari është përjashtuar nga lista për dy takimet eliminatore të këtij muaji, përkatësisht me 22 mars ndaj Turqisë dhe tre ditë vonë ndaj Andorës. Shkak është bërë vonesa e Strakoshës për t'iu bashkuar kombëtares, me gardianin që e ka justifikuar me faktin se ka humbur avionin.
Por kjo nuk është pranuar nga Panucci, që ka gjetur menjëherë zëvendësuesin e tij. Vendin e Strakoshës e ka marrë talenti i Superligës Shqiptare, Gentian Selmani. Kapiteni i Laçit do të jetë siguria e tretë për kuadratin e portës kuqezi, duke iu bashkuar kështu dyshes Alban Hoxha dhe Etrit Berisha.
Me një situatë të ngjashme si ajo e Strakoshës u përball edhe sulmuesi Sokol Çikalleshi pak muaj më parë. Ky i fundit nuk bën pjesë në planet e Panuccit të paktën që prej atij episodi, duke ngritur pikëpyetje edhe rreth të ardhmes së Strakoshës në kombëtaren shqiptare.
Lexo gjithashtu
