Pas barazimit 1-1 në shtëpi kundër Laçit, trajneri i Luftëtarit, Mladen Milinkoviç u shpreh për Supersport se nuk e kënaqi një pikë kundër kurbinasve, ndonëse e pranoi se skuadra e tij ishte me fat pasi edhe mund ta kishte humbur këtë takim. Ndër të tjera, Milinkoviç pranoi edhe faktin se Luftëtari ka objektiv mbijetesën.
"Mendoj se Laçi e meritoi barazimin sot ndaj nesh. Ne nuk ishim në nivelin tonë më të mirë. Në pjesën e parë luajtëm ngadalë dhe më pas u munduam të ndryshonim ritëm në pjesën e dytë, por për fat të keq nuk ia arritëm.
Luajtëm lart për të krijuar disa raste, por nëse nuk krijon presion, atëherë do të jetë kundërshtari që do të krijojë raste dhe pse jo, të shënojë.
E pamë sesi po shkonte ky takim dhe menduam të ndërhynim para se pësonim golin, por për fat të keq, Laçi shënoi para se të bënim zëvendësimet.
Në fund të ndeshjes luajtëm me 4 sulmues për ta fituar ndeshjen, por siç e thashë nuk patëm forcën goditese para portës kundërshtare.
Një tjetër problem që ndoshta na penalizoi ishte edhe dëmtimi i Ramadanit, që doli nga fusha gjatë ndeshjes.
Për sa i përket objektivit e kam thënë dhe vazhdoj të jem i mendimit se synimi ynë është mbijetesa, sepse kampionati do të bëhet edhe më i vështirë.
Sot nuk jam i kënaqur me një pikë kundër Laçit, sepse prisja fitoren. Por, edhe pse mund të duket e habitshme, sot kemi qenë me fat, sepse ndoshta edhe mund të kishim humbur. Sot kemi humbur 2 pikë, që do mundohemi t'i fitojmë pse jo në transfertë. Ajo çka dua të theksoj është edhe fakti se Kristal Abazaj nuk është në gjendjen e tij më të mirë që pas dëmtimit të pësuar kundër Korabit, sepse ka qëndruar 10 pikë larg skuadrës. Kur ai të rikthehet në formën e tij më të mirë, do të bëjmë paraqitje edhe më të mira se sot", tha trajneri i Luftëtarit, Mladen Milinkoviç në "Gol pas Goli".
Lexo gjithashtu
