Skënderbeu vuan dënimin e CAS, që e mban jashtë Europe për sezonet e ardhshme të Europës, çka shtyn drejtuesit që të shohin tregun e transferimeve si të vetmen rrugë për të siguruar të ardhura. Në Korçë dinë si të veprojnë, pasi ia kanë dalë më herët të kryejnë lëvizje të “bujshme” drejt kampionateve të huaja. Mësohet se së fundmi në adresë të korcarëve kanë mbërritur oferta konkrete për tre lojtarë.
Fjala është për Dejvi Bregun, Jorgo Pëllumbin dhe Nazmi Gripshin. Vlonjati i sulmit shihet me më interes për t’u larguar në janar, duke qenë se edhe vetë është shprehur pro një largimi. Sllovakët e Zilina janë të interesuar për shërbimet e 24 vjeçarit, duke “ngrohur” arkën e juglindorëve. Gripshi ndiqet me inters nga çekët e Teplice, që nga ana e tyre kanë bërë lëvizjet e duhura.
Një tjetër emër i përfolur është Pëllumbi, me lojtarin e Kombëtares U21 që ndiqet nga Gent në Belgjikë. Për 19 vjeçarin e mbrojtjes, presidenti Takaj nuk ulet më poshtë se 800 mijë euro. E sigurt është se janari do të jetë intensiv në kampin korçar.
