Teuta u mposht në “Niko Dovana” 0-1 nga Partizani për javën e 34 të Superligës. Demat me pikë të barabarta me durrsakët kryesojnë tabelën, ndërsa ka pasur debat në studion e Skaner mes drejtorit të Teutës, Sulejman Starova dhe atij të Partizanit, Olsi Rama. Nga vendosja e arbitrit, te polemikat për kërcënim dhe mbajtje jo korrekte, këto kanë qenë disa nga temat e diskutimit.
“Përtej penalltisë e kartonëve të verdhë, ku është edhe një Brojës i paqenë, nëse flasim me statistika Teuta ka marrë 24 faulle dhe Partizani 10, në një ndeshje të luftuar, ndër të cilat tre janë vërshëllyer ku topi është nxjerrë jashtë apo ishte në vazhdimësi aksioni premtues për ne. Pra janë dhënë vetëm 7 faulle në një ndeshje të tillë e çdo kontrast shoqërohej me vërshëllimë në favor të Teutës”, tha Rama për gjyqtarin Ferataj.
Menjëherë ka ardhur reagimi i Sulejman Starovës, që ka treguar se disa arbitra nuk mund të gjykonin këtë sfidë për shkak të kontenstimeve të mëparshme që kanë bërë klubet. “Jorgji sa te ketë jetën nuk do të prekë bilbil me Teutën. Meta sa të ketë jetën gjithashtu. Daja kundërshtoi katër herë rresht Hamitin, iku edhe ai. Juxhin Xhaja ishte protagonist kundër Teutës në 2 ndeshje”, tha Starova.
“Atëherë paskan qenë me kërkesë të Teutës”, u kundërpërgjigj Rama. “Ne nuk kemi asnjë kundërshtim, thjesht kemi thënë se Hamiti na ka arbitruar disa ndeshje radhazi. Për Jorgjin e mësova sot, Xhajën nuk e dija. Meta edhe mund të ishte, por do të kishte konflikt interesi meqë e kemi dërguar në Prokurori, por nuk kemi bërë kundërshtim për të në Federatë”, tha drejtori i Partizanit.
Në fund të debatit nuk mund të mungonte një ngacmim në lidhje me pretendimet se Rama kishte ndërhyrë te arbitri në pushimin e ndeshjes dhe se një drejtues i Teutës e kishte dëgjuar duke e ofenduar.
“Nuk mohoj asnjëherë gjërat që kam bërë, por nuk kam bërë asgjë tjetër përveçse i kam kërkuar drejtësi. Ka ndodhur kur dola pas pushimit nga dhomat e zhveshjes dhe isha në tunel para se të ngjitesha lart. I kam thënë vetëm “mbaje drejt”, pasi kam përgjegjësinë si drejtues i Partizanit që të mbroj djersën e mundin e skuadrës. Nëse të kërkosh drejtësi quhet t’i bësh presion…”, shpjegoi Rama.
Loading ...
