Sot, Tirana do të zhvillojë seancën e parë stërvitore në kuadër të përgatitjeve për Vllazninë. Bardheblutë e drejtuar nga trajneri Mirel Josa do të marrin ngarkesën e duhur në mënyrë që të jenë sa më në formë për këtë takim. Por, sot te Tirana kanë arsye për të gëzuar pasi do të bashkohet të stërvitet me grupin, kapiteni Erando Karabeci. Mesfushori prej dy muajsh nuk ka zbritur në fushë pas atij aksidenti të frikshëm që pësoi në kabinën e dushit. Ai tashmë ka lënë pas dëmtimin dhe pas një fazë rihabilitimi është gati për të dhënë kontributin e tij për fanelën bardheblu.
Çfarë ndodhi me Karabecin
Erando Karabeci pësoi një aksident në kabinën e dushit, natën që Tirana u kthye nga faza përgatitore e Antalias. Kapiteni i bardhebluve u dërgua me urgjencë në spital, ku iu nënshtrua një operacioni duke marrë 20 të qepura në kofshë. Për një javë ai nuk duhej të lëvizte nga shtrati dhe më pas u detyrua të ecte me ndihmën e patericave. Dalëngadalë gjendja e Karabecit nisi të përmirësohej dhe prej dy javësh ai kishte nisur një fazë rihabilitimi me vrapime të lehta dhe ushtrime fizike. Së fundmi 28-vjeçari është gati për t’u vënë nën urdhrat e trajnerit Josa, në mënyrë që të japë kontributin e tij për 10 javët e mbetura të Superiores.
