Lorik Cana e ka mbyllur me kombëtaren kuqezi në mënyrën më të mirë, me një sukses që edhe ai vetë ndoshta nuk e ka besuar më parë. Pas një periudhe 13-vjeçare, futbollisti më i njohur shqiptar në botë, ka vendosur të thotë “stop”. Sipas “Sport Ekspres”, në FSHF janë duke menduar për t’i bërë një nderim të veçantë kapitenit. Hapi i parë është për një ndeshje lamtumire, ku Loriku do të përshëndesë tifozërinë kuqezi, ndërsa befasia është se edhe fanella me numrin 5 mund të tërhiqet, që do të thotë se në vazhdim nuk do të luajë askush me këtë fanellë. Ky do të jetë një rast i veçantë. Pjesëmarrja historike në një Europian ishte mënyra më e mirë për të mbyllur karrierën kuqezi, por tani është radha e FSHF-së për ta surprizuar kapitenin. Për ndeshjen e lamtumirës diskutohet që të luhet në fund të gushtit.
Lexo gjithashtu
