Katar 2022
Sonte, e mërkurë, më 17 maj 2017, luhet finalja e Kupës së Italisë në futboll, mes Juventusit dhe Lazios. Fusha e blertë e “Olimpico” të Romës do të zbulojë edhe fituesin e trofeut të parë futbollistik kombëtar në Apenine.
Në fakt, këtë sezon, Juventusi është skuadra e vetme europiane, në garë për tripletën. Bardhezinjtë e drejtuar nga Allegri synojnë të fitojnë titullin e Seria A, Kupën e Italisë dhe Champions-in.
Një sukses të tillë në Itali, deri më tani e ka arritur vetëm një ekip, në vitin 2010. Fjala është për epokën e Interit të Massimo Morattit dhe Jose Mourinhos. Për të siguruar që ish-presidenti zikaltër nuk është kundër suksesit të trefishtë të Juventusit kanë menduar dy drejtuesit e emisionit “Le lene”, Stefano Corti dhe Alessandro Onnis.
Ata vendosën t’i bashkohen Morattit në ditëlindjen e tij të 72-të, duke i dhënë edhe disa dhurata. Në to përfshihej edhe një fanellë e Juventus. Në vijim, “Tuttosport” sjell disa fragmente të takimit mes tyre.
Lene: Në qoftë se ju mund të zgjidhni, çfarë trajneri do të shihnit në stolin e Interit: Conte, Spalletti apo Simeone?
Moratti: Sarrin.
Lene: Doni Sarrin?
Moratti: Po.
Lene: A do të dëshironit që Juventusi të fitojë tripletën, sikurse bëtë ju në vitin 2010? Apo do t’ju merrte këtë rekord …
Moratti: Juventusi mund të fitojë një tjetër tripletë, nuk është se do të na e merrte ne këtë rekord në Itali. Në jetë mund të ndodhë që të tjerët të kenë të njëjtat lloje suksesesh. Le të presim dhe të shohim.
Lene: Do të jeni në finalen e 3 qershorit, Juventus-Real Madrid?
Moratti: Jo, do ta shoh nga televizori atë, sepse kam disa angazhime. Do ta pres me qetësi rezultatin.
Lene: Një fanellë e Juves si dhuratë për ju. Thuaj atë me ne, të paktën, për herë të fundit: Forca Juve!
Moratti: Mirë, forca Juve! (qesh)
