Ish-gjimnasti Gani Mezini në moshën 74 vjeçare u dekorua nga Presidenti i Republikës Ilir Meta me titullin "Mjeshtër i Madh i Sportit". Edhe pse titulli ishte firmosur kohë më parë, ceremonia e dorëzimit të titullit u zhvillua në qytetin e Vlorës, me pjesmarrjen e veteranëve të sportit dhe miqve të Gani Mezinit, por edhe nën moderimin e gazetarit Defrim Methasani. Propozimin e bëri Viron Toska, shefi i klubit shumësportësh të "Flamurtarit" të Vlorës, dhe miratimin e kryetarit të Bashkisë Dritan Leli, ish-gjimnasti rekordmen dhe mësuesi model u vlerësua me titullin e lartë.
Leonard Tase, këshilltar për sportet tek presidenti i Republikës i dorëzoi Mezinit edhe titullin e madh. "Presidenti i Republikës i jep Gani Mezinit titullin "Mjeshtër i Madh" në shenjë mirënjohje për punën e palodhur, për kontributin e çmuar në zhvillimin dhe rritjen e gjimnastikës, kulturës fizike duke shpalosur vlerat e një sportisti e trajneri model në qytetin e Vlorës" thuhet në motivacion. I lindur në vitin 1945, ai pati karrierë si gjimnast dhe ka fituar shumë konkurrime kombëtare e ndërkombëtare, ndërsa në vitet 80-90, brezat e kujtojnë për rritjen e sportit të gjimnastikës në gjithë qytetin e Vlorës.
Lexo gjithashtu
