Shqipëria gjendet në Francë, ku po merr pjesë në Kampionatin Evropian. Por, kuqezinjtë kanë mungesën më të rëndësishme, tifozin Ballist Morina. Ballisti gjendet në një fshat të Shqipërisë në arrest shtëpie dhe është vizituar nga gazeta e madhe franceze, “L’ Equipe”.
Përmes një artikulli brilant kushtuar Ballistit, “L’ Equipe” e quan atë njeriun që ka meritën që Shqipëria ka shkuar në “Euro 2016”, duke përmendur tri pikët që Shqipëria i kishte marrë në CAS për ndeshjen me Serbinë.
“Një njeri që e kishte varur një flamur të Shqipërisë së Madhe në dron në ndeshjen në Serbi. Ismail Morina ia ka kualifikuar Shqipërinë në “Euro 2016. Ne e kemi gjetur atë në fshatin ku ndodhet në arrest shtëpie”, shkruan “L’ Equipe”, e cila artikullin për Ballistin e titullon: “Ismail Morina, lojtari i dymbëdhjetë i Shqipërisë”.
