Lenjani: E njohim Francën mjaft mirë, do japim maksimumin

Ermir Lenjani është një nga lojtarët më produktivë në Kombëtare, ndërsa është përzgjedhurdhe nga trajneri De Biazi si titullar në formacionin bazë për sfidën me Zvicrën. Ndërsa diçka e tillë pritet që të konfirmohet edhe për takimin e së mërkurës mbrëma, ku Shqipëria do të përballet me Francën.

Lenjani është lojtar që luan në Francë, e njeh mirë mentalitetin vendës, por edhe lojën e kundërshtarit. Këtë e shpreh edhe në konferencën për shtyp që është organizuar para pak minutash në rezidencën ku po qëndron Kombëtarja kuqezi.

“Cana do të mungojë në ndeshjen me Francën, por ne nuk do të kemi probleme në mbrojtje me mungesën e ti. Ne kemi luajtur vjet kundër Francës dhe do të bëjmë më të mirën që të përsërisim atë që ndodhi vjet. Zhvilluam lojë të mirë kundër Zvicrës, por tashmë nuk duhet të mendojmë Zvicrën, duhet të mendojmë Francën që luajmë kundër të mërkurës. Duhet të shohim përpara për dy ndeshjet e radhës dhe duhet të bëjmë më të mirën e mundur. Ne kishim shumë motivim për lojën, por kishim edhe emocione në atë takim. Tashmë gjithçka ka kaluar dhe e hedhim pas krahëve, jemi gati për Francën dhe do të japim maksimumin në lojë. Kemi folur me stafin, kemi diskutuar për ekipin kundërshtar, të cilin e njohim mjaft mirë. Ne i njohim lojtarët e Francës, ndaj do i mbajmë një për një. Do të përqendrohemi për këtë takim dhe do të bëjmë më të mirën. Sa i përket pozicionit tim, kam detyrë që të ndihmoj mbrojtësit. Por, duhet që të marr pozicion të mirë dhe në çdo shans që më jepet për të sulmuar duhet ta shfrytëzoj. Në këtë ndeshje duhet të kemi vetëbesim dhe të bëjmë lojë të sigurt“, sqaroi Lenjani.