Më në fund ka ardhur dhe komunikimi zyrtar i UEFA-s në FSHF për klubet shqiptare që do të marrin pjesë në kompeticionet europiane. Përfundimisht Skënderbeu, Kukësi, Partizani dhe Teuta do të jenë pjesë e shortit të ditës së nesërme për ndeshjet që do të luhen në Turin e Parë të Champions apo Europa League. Sipas komunikimit zyrtar të ardhur në FSHF, i cili pritet të bëhet publik pak më vonë, njoftohet se këto janë katër ekipet shqiptare që do të marrin pjesë në kompeticionet europiane, duke qartësuar situatën edhe për skuadrat që shpresonin për më shumë, Partizani dhe Tirana.
Pra, Skënderbeu është zyrtarisht në short, sipas komunikimit të ardhur në FSHF.Teuta, Kukësi dhe Partizani do të jenë pjesë e shortit për në Europa League. Ky njoftim do t’iu bëhet edhe klubeve përkatëse më vonë nga institucioni i futbollit në vend.
Sa i përket situatës së Skënderbeut, i cili pret vendimin përfundimtar të CAS-it në datën 5 korrik, ai është i tillë: Edhe nëse në datën 5 korrik Skënderbeu dënohet, kundërshtari që do të jetë përballë tij në short do të kualifikohet direkt në Turin e Dytë Eliminator të Champions League. Ndërsa treshja Partizani-Teuta-Kukësi do të vazhdojnë normalisht në Europa League.
Pra, këto katër ekipe deri ditën e nesërme në orën 12:00 duhet të kenë dorëzuar listën zyrtare të lojtarëve për dy ndeshjet e para eliminatore. Mbeten të pakënaqur Tirana dhe Partizani, skuadra të cilat shpresonin për më shumë. Tirana dëshironte pjesëmarrjen në Europa League në rast se do të dënohej Skënderbeu, ndërsa Partizani të merrte vendin në Champions League. Kjo gjë nuk ndodhi, kështu që të dy ekipet janë të zhgënjyer për këtë që ndodhi.
