Asjon Daja ishte mesfushori më i kërkuar gjatë merkatos së verës, por tashmë ka formosur për Tiranën. Burime pranë lojtarit bëjnë me dije se ai ka firmosur sot për klubin më të titulluar në vend, duke refuzuar përfundimisht ofertën e Partizanit. Daja kërkohej me ngulm nga Kukësi dhe Flamurtari, por edhe Partizani dëshironte patjetër rinovimin, por ai ka refuzuar gjithçka për një fanellë të re.
Lojtari do t’iu bashkohet bardhebluve në fund të qershorit, kur t’i mbarojë kontrata me të kuqtë. Ai ka nënshkruar deri më 30 qershor me Partizanin, çka e mban atë ende pjesë të tyre, megjithatë, më 1 korrik ai do të jetë pjesë e bardhebluve, duke bërë që këta të fundit të fitojnë ‘derbin’ për këtë futbollist.
Asjon Daja është prodhim i shkollës dinamovite të futbollit, ku ka debutuar në vitin 2009 me 18-herë kampionët e vendit në Superiore. Gjatë sezonit 2009-2010 u huazua në Peqin te Shkumbini që asokohe luante në elitën e futbollit shqiptar, ndërsa në sezonin 2012-2013, pas rënies së Dinamos në të parën, ai firmosi për Kastriotin ku luajti për dy vite. Pra, prej dy sezonesh ai mbrojti ngjyrat e Partizanit, ku luajti 47 ndeshje në kampionat dhe shënoi vetëm 1 gol. Për 26-vjeçarin e lindur në Tiranë, skuadra e re është Tirana, ku burime pranë tij konfirmojnë se ka firmosur për dy vitet e ardhshme.