Partizani ka zhvilluar para pak momentesh konferencën e zakonshme të shtypit para ndeshjes me sllovakët e Slovan Bratislavës, që luhet nesër në Elbasan. Por ajo që habit është se në këtë ndeshje të kuqtë do të drejtohen në stol nga Sulejman Starova. Ky vendim ka ardhur për faktin se trajneri i ri, italiani Sormani, do të zyrtarizohet pas datës 30 qershor.
STAROVA – Trajneri provizor ka folur për ndeshjen e nesërme, ku ka theksuar: “Përballë do të kemi një kundërshtar të fortë, jemi të vetëdijshëm për këtë pasi e kemi studiuar përgjatë gjithë këtyre ditëve. Ekipi është përgatitur plotësisht për t’u përballur denjësisht ndaj kundërshtarit Slovlan Bratislava dhe të gjithë lojtarët po gëzojnë një gjendje të mirë fizike, falë edhe punës që është kryer në përgatitjet që kemi zhvilluar në Itali. Sigurisht, edhe një barazim pa gola do të ishte favorizues për ne, duke ditur vlerën e golit në fushë kudërshtare, megjithatë shpresojmë ta fitojmë përballjen e parë. Në drejtimin e skuadrës do të jem unë dhe Dalipi, kjo për faktin se Adolfo Sormani, si pasojë e rregullave të FIFA-s nuk mund të regjistrohet për kompeticionet ndërkombëtare përpara datës 1 korrik. Rregulla, të cilat na kanë penalizuar edhe në përforcimin e ekipit me të tjerë lojtarë. Sukaj tashmë është pjesë e skuadrës, shpresojmë të jetë i gatshëm, pasi është i domosdoshëm për ekipin. Do të luajmë në “Elbasan Arena”, por besoj se edhe atje nuk do të na mungojë mbështetja e tifozerisë tonë. Besoj se të martën do të jenë të shumtë, duke na përkrahur masivisht”.
TOMORI – Po punohet për një ekip kompetitiv, ju garantoj se ditët në vijim skuadra do të përforcohet për të realizuar objektivat e sezonit, fitimin e të dy trofeve. Gjithsesi, parësorë për ne në këtë moment është të kalojmë pozitivisht përballjet në Europa League. Objektivi parësor yni është kalimi i turit të parë. Synojmë të zgjidhim ndeshjen e parë në favorin tonë, në mënyrë që në sfidën e kthimit ta kemi edhe më të lehtë. Përsa i përket çështjes Fejzullahu, për ne ai mbetet një lojtar i Partizanit. Fejzullahu është në kontratë me ne dhe klubi disponondon dukumentacionin e plotë, që mund ta gjeni edhe në federatën tonë të futbollit”, – tha drejtori Tomori gjatë konferencës.
SUKAJ – Xhevahir Sukaj nuk është në listën e të kuqve për ndeshjen me Slovan Bratislavën, por drejtuesit e Partizanit sqarojnë se ai është pjesë e grupit, edhe pse jo në formën optimale sportive.
FEJZULLAHU – Drejtori i ri i Partizanit, Genc Tomorri, ka sqaruar edhe çështjen e mbrojtësit kosovar Arbnor Fejzullahu. “Fejzullahu është ligjërisht lojtar i Partizanit edhe për 1 sezon”, – ka thënë Tomori, duke prerë kështu shpresat e korçarëve për ta pasur në ekip mbrojtësin e djathtë.
