Tirana pret nesër Skënderbeun në "Selman Stërmasi" për të luajtur takimin e javës së 25-të të Superligës.
Trajneri i bardhebluve, Mirel Josa ka folur pak minuta më parë për këtë takim, por edhe për shumë tema të tjera që e shqetësojnë atë te skuadra që drejton, një ndër të cilat edhe dëmtimi i Gentjan Muçës.
Në konferencën për shtyp, trajneri i Tiranës pranoi se fakti që ai është një ish i Skënderbeut mund të jetë një bonus për ekipin korçar dhe jo për skuadrën që ai drejton, duke qenë se bardhekuqtë kanë ndryshuar shumë kohët e fundit, ndërsa bardheblutë nuk kanë pasur ndryshime në kontingjent.
"Pas një kohe të gjatë kthehem të flas para një ndeshje dhe kjo përkon me takimin kundër Skënderbeut, një ekip që ka treguar vazhdimësi pozitive në javët e fundit.
Kemi përballë, një kundërshtar të fortë, që e drejton një trajner që e organizon shumë mirë ekipin e tij. E kemi përgatitur shumë mirë këtë ndeshje, duke qenë se Skënderbeu di të sulmojë dhe të mbrojë shumë mirë. Ne nuk kemi treguar një formë pozitive gjatë kësaj periudhe, por do të bëjmë maksimumin. Kur luajmë me ekipet e kreut, lojtarët motivohen më shumë. Më shqetëson fakti që ekipi nuk luan në bllok.
Nga Skënderbeu kam kohë që jam shkëputur, edhe pse e njoh mënyrën sesi luan.
Te Skënderbeu kanë ardhur lojtarë të rinj dhe ka një stol me alternativa bindëse. Fakti që unë jam ish i ekipit korçar, mund të ndihmojë Skënderbeun, sepse Tirana në fakt nuk ka ndryshuar shumë. Rezultati do të varet nga mënyra se si do të sillet ekipi im në fushë, që në fillim.
Morali i ekipit? Nuk jemi në gjendje psikologjike optimale. Por, në stërvitje kam parë impenjim maksimal para këtij takimi, gjë që nuk e kam parë së fundmi. Të gjithë janë shumë të angazhuar për të dhënë maksimumin kundër Skënderbeut. Pas sfidës kundër Partizanit, tre-katër lojtarë nuk kanë qenë të gatshëm për të luajtur. Unë dua që Tirana të luajë si skuadër dhe të sillet si e tillë në fushën e lojës.
Kam besim te lojtarët e mi, sepse kam shumë futbollistë të mirë në përbërje. Rezultati pozitiv do të na bëjë të kemi më shumë moral për ndeshjet e tjera në vazhdim. Do të shfrytëzojmë ata lojtarë që kemi në dispozicion. Më shumë nuk di çfarë të them, sepse edhe dje e pamë se çfarë ndodhi në Champions League me Barcelonën dhe mënyrën sesi u soll në fushë PSG-ja.
Ne nuk duhet të fitojmë vetëm me Skënderbeun, sepse Tirana duhet të hyjë në fushë për t'i fituar të gjitha ndeshjet.
Sjellja në futboll duhet të jetë e njëjtë, jo vetëm një ditë para ndeshjes, por gjatë gjithë javës së përgatitjeve.
Çfarë do ndryshoja te Skënderbeu? Nuk merrem me Skënderbeun, sepse shoh ekipin tim. Sa për ndryshime te Tirana, duhet t'ia lëmë kohës dhe të shohim sa personalitet do të shfaqin lojtarët në vazhdim.
Gjykimi? Nëse do flisja për këtë temë, do dukej se do justifikoja punën time këtu. Por, unë nuk dua ta bëj këtë gjë.
Gentjan Muça? Më shqetëson gjendja e tij, sepse nuk ka luajtur në formën e tij më të mirë. Ka pasur probleme fizike dhe dhimbje të shpinës. Më vjen keq, sepse do të kisha një zgjidhje më shumë për ekipin. Por, mendoj se më mirë është që në këtë moment të luajë një futbollist që është në formë të mirë fizike dhe të zgjidhet ky problem për Muçën. Uroj të kthehet sa më shpejt. Do të na kthehet edhe Kërçiku që do të jetë në 11-she të skuadrës, por nuk mund të bëj prova pa e parë në fushë për shumë minuta", tha trajneri Mirel Josa në konferencën për shtyp para ndeshjes kundër Skënderbeut./ NEWSPORT.AL
Lexo gjithashtu
