Lajmi i fundit/ Ilir Daja shpreh rezerva për sulmin e Tiranës

Tirana ka barazuar pa gola në Laç, duke mos marrë pikët që ka pretenduar. Ndërsa trajneri i bardhebluve shpreh rezervat e tij kundër sulmit, por duke qenë se nuk ka pasur alternativa të shumta, ai tregon se mungesa e dokumentacionit për lojtarët me ngjyrë bëjnë që Tirana të çedojë në repartin ofensiv, aty ku kreu më tepër merkato gjatë verës.

“Do të thosha që ndeshja e sotme, që bëhet pas katër ditëve të ndeshjes me Teutën, ishte i njëjti formacion, sepse nuk kemi alternativa për të rifreskuar ekipin. Na mungojnë lojtarët që përbëjnë vijën e parë. Nëse do të kishim në dispozicion lojtarët afrikanë, do të kishim më tepër mundësi për ndryshime në formacion. Nëse do të kishim ata në lojë, do të kishim ndërrime direkt. Daja sakrifikoi për ekipin. Ishte me temperaturë. Nuk kemi performuar mirë sepse nuk kemi pasur ritmin e duhur, por me ardhjen e kontigjentit do të performojmë ndryshe”.

“Sigurisht që sot nuk e mora vesh pse tifozët nuk u lejuan, sepse ata ishin të pranishëm sot dhe janë suport i fuqishëm për ne. Një pjesë e tifozëve nuk u la që të shihnin ndeshjen. Nuk duhet thënë se ndeshjet brenda apo jashtë ka ndryshim të madh. Në laç kushte të mira, terren të mirë, luajtëm si në fushën tonë”.

Mbrojtja – “Kur të gjithë repartet nuk funksionojnë në rregull, normalisht do të lësh hapësira që do të shfrytëzojë kundërshtari. Në këtë ditë nuk kemi lojtarë si Fukui, por besoj që në merkaton e verës është punuar për t’i zëvendësuar, por lojtarët që nuk mund të aktivizohen sot, të cilët janë lojtarë që janë në vijën e parë apo të dytë të sulmit, do t’i jepnin lojës ekuilibër më të madh qoftë në sulm, qoftë edhe lojtarët e tjerë të pozicionuar në rolet natyrale”.

Sulmi – “Nuk mund të fajësosh repartin e mbrojtjes për gabimet, sepse repartet funksionojnë në grup. Do të thosha që Tirana e sotme, ose më sakt ky kontigjent që kishim sot, nuk ka repart sulmi. Me largimin e Bakaj dhe Fukui ne e kemi plotësuar me lojtarët afrikanë që janë të gjithë në këtë repart, por mospajisja e tyre me leje nga FIFA për t’u aktivizuar, do të thotë se ne nuk mund të kemi sulm. I vetmi i aktivizuar për tyre është Edeh, ndaj të cilit kam rezerva. Por, me aktivizimin e lojtarëve të tjerë, edhe Edeh do të performonte ndryshe. Rivalitet më i madh do të jepte ndikimin e tij për të pasur më tepër rivalitet në formacion. Kaluam me tre mbrojtës, duke çuar Hoxhallarin sulmues të majtë, sepse nuk kishim, duke qenë se na mungonte alternativa në sulm”.

Objektivat – “Sot ishte objektiv fitorja dhe jo promovimi i lojtarëve të huaj. Duke rrezikuar gjithçka për gjithçka, mendova të fus Domgjonin dhe Turtullin, të cilët janë shtatlartë që mund të përbënin rrezik permanent për kundërshtarin. Natyrshëm që unë nuk do të paragjykoj që janë lojtar të rinj apo të vjetër, pasi kush e meriton, do të veshë fanellën e Tiranës”.