Skënderbeu u mposht ditën e sotme në shtëpi nga Dinamo, në ndeshjen e prapambetur, e cila ishte e vlefshme për javën e 20-të të “Abissnet Superiore”. Sfida që u zhvillua në stadiumin “Skënderbeu” të Korçës, përfundoi me fitoren 0-1 të dinamovitëve, golin për të cilët e shënoi Lorenco Vila me anë të një penalltie në minutën e 52’. Pas kësaj sfide, për mikrofonat e MCN TV, ka folur trajneri i Skënderbeut, Ivan Gvozdenovic.
“Për mendimin tim ne ishim më mirë në pjesën e parë. Ata rrezikuan nga fillimi me topa të gjatë, më pas ne dominuam. Nuk dua ta komentoj penalltinë, nuk e di nëse ishte apo jo. Më pas loja u bë me shumë faulla dhe u bë e vështirë. Ne kishim 4 sulmues ne 30 minutat e fundit. Ne humbëm, por ky është futbolli”, u shpreh fillimisht Ivan Gvozdenovic.
“Në pjesën e dytë nuk kishim mundësi të luanim futboll. Dinamo vononin lojën, kishte faulla shumë. Ata vononin nga portieri dhe linja mbrojtëse edhe ishin vetëm 5 minuta shtesë. Dinamo ishte në pjesën e dytë shume e qetë pasi shënuan shumë shpejt me penallti. Ata më pas luajtën vetëm me kundërsulme”, tha më tej trajneri i Skënderbeut.
“Roli i Liços në fushë? Në pjesën e dytë luajti në rol jonatyral, ndërsa në të parën po. Në pjesën e parë ai gjuajti 2-3 herë drejt portës. Ishim me dy sulmues dhe për këtë arsye ai luajti pak më ndryshe sot”, u shpreh Gvozdenovic.
“Dëmtimi i Franklin ishte një minus për ne, pasi po bënte diferencën në fushë. Ai ishte shumë i rëndësishëm për ne. Dinamo pas golit, ishte psikologjikisht më e fortë se ne dhe kjo është normale. Kjo ishte diferenca pse nuk ishim mirë si në pjesën e parë. Zëvendësimet? Me ato donim të fitonim lojën në ajër, pasi ata rrinin shumë mbrapa dhe ideja ishte të luanim majtas ose djathtas dhe të krosojmë në zonë”, e mbylli fjalën e tij trajneri i korçarëve.
Lexo gjithashtu
