Trajneri i Partizanit, Klevis Dalipi ka folur për shumë gjëra dhe detaje lidhur me futbollin në vend në një pronocim dhënë për "Tirana Today". Ai ka zbulura disa detaje interesante nga jeta e tij, duke e nisur që nga koha kur ishte lojtar dhe deri tani që është konfirmuar në pankinën e "Demave të Kuq".
"Sapo kisha mbushur 21-vjeç dhe isha në kulmin tim si futbollist. U ftova nga Shqipëria U-21 sepse kishim një ndeshje miqësore kundër Portugalisë. E dija se në Shqipëri nuk mund të zhvilloja profesionin tim, pasi ishte viti 1997, kështu që vendosa të qëndroj në Portugali. Më pas nisi një karrierë e re për mua që zgjati 7 vjet. Momenti im më i mirë ishte te Santa Clara që luajta në Superligë", ka treguar fillimisht Dalipi.
Ai ka folur dhe për eksperiencën e tij si zv/trajner dhe trajner, duke mos harruar pa përmendur dhe ish-trjanerin e Partizanit, Sulejman Starovën dhe lojtarët: "Kur je lojtar e ke më të lehtë për t'u bërë një trajner i mirë nëse ke pasion dhe intuitë. Starova? Kam punuar më gjatë nga të gjithë me të. Kam mësuar shumë prej tij, por ishte i pafat, pasi u ndëshkua në Korçë. E dimë se është e vështirë, por kemi bërë një pakt mes lojtarëve dhe klubit që ta dërgojmë klubin në Europë".
Dalipi nuk ka lënë pa përmendur dhe gjyqtarët të cilën kanë qenë ndër më të kritikuar javët e fundit të kampionatit, duke thënë dy fjalë dhe për Tiranën.
"Me ardhjen time si trajner, lojtarët nuk merren më me gjyqtarët, pasi është klubi ai që merret me arbitrat. Tirana është në rrugë të mbarë dhe do të kthehet. Shumë mirë që do të ngjiten, pasi nuk ka kuptim Superiorja pa derbin, aty është adrenalina për të gjithë futbollin shqiptar".
Trajneri aktual i "Demave të Kuq" ka komentuar dhe vendimin e marrë nga UEFA për dënuar klubin e Skënderbeut me 10 vite dhe gjobë 1 milion euro.
"Më vjen keq si trajner, pasi dënimi i tyre i bën keq kampionatit". Në fund nuk mund të rrinte pa komentuar dhe trajnerin Christian Panuçi. "Shpresoj të vijë të shohë ndonjë ndeshje të Superiores, pasi ka cilësi. Në fund, do të jetë ai që do të vendosë".
Tekniku elbasanas ka komentuar dhe punën që Olsi Rama bën në këtë klub: "Rama ka transmetuar qetësi. Ka sjell shumë cilësi në kampin e kuq. Stafi dhe lojtarët bëjnë punën e tyre, ndërsa ai punën e tij".
Lexo gjithashtu
