Erzeni mbylli sezonin në mënyrën më të keqe të mundshme, duke mos ia dalë që të mbijetojë në elitë. Ekipi shijakas u rendit në vendin e parafundit (9-të) në tabelën e klasifikimit, duke i shkaktuar kështu rënien në Kategorinë e Parë.
Me rënien e klubit shijakas një kategori më poshtë, lojtarët që kanë rënë në sy gjatë sezonit në Superiore janë vënë në shënjestër. Një ndër ta është edhe mesfushori, Bekim Maliqi.
Ky i fundit ishte një nga notat e pakta pozitive të Erzenit. Maliqi ishte titullar i padiskutueshëm në radhët e Erzenit, duke shënuar 4 gola dhe duke dhuruar 6 asistime gjatë 38 ndeshjeve që luajti.
Ky sezon mjaft i mirë i 22-vjeçarit ka rënë në sy të skuadrave të Superiores së Shqipërisë, por edhe Superligës së Kosovës. Ekipe të ndryshme si në Shqipëri apo toka dardane, kanë shfaqur interes për Maliqin.
Kujtojmë që futbollisti ka edhe 1 vit kontratë me Erzenin, kështu që kushdo që e dëshiron në ekip duhet të bindë jo vetëm lojtarin, por edhe klubin shijakas për ta lënë të lirë.
Lexo gjithashtu
