Eros Grezda, ish-lojtari i Rangers dhe tanimë i Osijek në Kroaci i ka sytë nga Kombëtarja dhe Edi Reja, teksa në një intervistë për Fan Zone është shprehur se është në formë të mirë sportive, ndërsa pret rifillimin e kampionatit. Ish-lojtari i Kombëtares shqiptare tregon se periudhën e karantinës e ka kaluar me të dashurën, ndërsa nuk e di sesi do vijojë rruga e tij pas futbollit.
“Jam në formë shumë të mirë dhe nuk jam mërzitur fare nga karantina. Para se të vinte piku i virusit unë i kisha marrë masat për trajnim dhe këtë gjë kam bërë. Më pëlqen Kroacia dhe veç motit këtu ka gjëra të tjera të bukura për të bërë. Kemi filluar stërvitjen normale dhe në 31 maj nisim ndeshjet e Kupës dhe në 3 qershor me kampionatin. Rregullat janë striket edhe nga klubi, në stërvitje duhet të vijmë 10 minuta përpara ndërsa nuk duhet të shkojmë në dushe.
Nuk jam bërë pishman për kalimin te Rangers, kur më erdhi oferta nuk i thashë ‘jo’ një klubi të madh. Atmosfera atje është ndryshe nga çdo vend, ata jetojnë për futbollin.
Kombëtarja? Pas atij incidenti, me trajnerin Reja nuk kam pasur asnjë kontakt. Shpresoj që të grumbullohem. Nëse trajneri më fton, do e pranoja me kënaqësi. Jam në formë të mirë pas rikthimit. Këtu ndihem si në shtëpi. Karantinën e kam kaluar me të dashurën dhe nuk e kam kuptuar si ikën kaq shpejt ditët. Nuk e kam menduar se çfarë do të bëj pasi të lë futbollin”, tha mes të tjerash 25 vjeçari.
© 2024 News Sport - Dev by Aplikacione.com.