Nga ekipi aktual i Skënderbeut, ai është më i vjetri. Marko Radas e meriton me të drejtë të jetë kapiteni dhe figura kryesore e bardhekuqve. Radas ka përgjegjësinë të mbajë të bashkuar ekipin, i cili ka vuajtur largimet e një pjese të rëndësishme të futbollistëve. Fitorja me Partizanin tregoi se Skënderbeu nuk ka humbur asgjë nga pamja e viteve të kaluara.
Në një intervistë për “Supersport” 34-vjeçari kroat foli për rëndësinë e fitores ndaj Partizanit, celësin e suksesit të skuadrës, besimin ndaj sulmuesit të Skënderbeut Blerim Krasniqi dhe aftësinë për të menaxhuar mjaft mirë veten pas kaq vitesh eksperiencë.
“Më vjen mirë që e nisëm me një fitore, edhe pse nuk mund ta konsideroj të thjeshtë. Është shumë e rëndësishme, pasi fituam ndaj një rivali direkt. Sekreti është forca e grupit, kjo është pika e fortë e Skënderbeut, të luajmë të gjithë si një skuadër. Kemi një organikë, cilësore pavarësisht largimeve.Ndoshta skuadrat tregohen më të kujdesshme për të mos pësuar. Mund të thuhet se dikur ishin Pejic, Ekuban apo Salihi e Soëe, por është vetëm fillimi dhe qendërsulmuesit mund të spikatin. Nuk besoj se ne kemi nevojë për sulmues në merkato. Krasniqi është një qendërsulmues shumë i mirë, të gjithë besojmë tek ai. Ndoshta në ndeshjen e parë i mungoi pak besimi, por kur ta gjejë do të tregojë vlerat e tij. Eksperienca që kam fituar këto 7 vjet te Skënderbeu, pastaj më ndihmojmë shumë edhe shokët e skuadrës. Bëhet gjithçka më e lehtë kur luan përkrah një lojtari si Vangjeli, që gjithashtu ka shumë eksperiencë”, deklaron për “Supersport” kapiteni Radas.
Në 7 sezone me “Ujqërit e Dëborës” Radas numëron 262 ndeshje, 6 kampionate të fituara, një kupë dhe 3 superkupa.
Ai konsiderohet një legjendë e vërtetë e ekipit korçar.
