Stiven Shpendi bëri hapin e madh në karrierë, teksa pak ditë më parë u zyrtarizua te Empoli. Sulmuesi kuqezi do të ketë mundësinë të luajë mes më të mirëve në Serie A. Në lidhje me transferimin e tij në konferencën për shtyp ka folur trajneri Paolo Zanetti.
Timonieri i Empolit ka theksuar se ky është një investim shumë i rëndësishëm që ka bërë klubi dhe se Shpendi ka rënë menjëherë në sy. Sipas Zanettit talenti i kombëtares do të jetë një lojtar me të ardhme, pasi ka karakteristika fantastike që vetëm lojtarët e mëdhenj i zotërojnë.
“E vetmja gjë që më shqetëson është pritshmëria që ka rreth tij. Kemi bërë një investim të rëndësishëm për atë që është dimensioni ynë dhe ka çdo gjë që duhet për t’u bërë një lojtar i një niveli shumë të lartë, pasi kombinon shpejtësinë shumë të madhe me një teknikë të mirë dhe sidomos një vullnet dhe një uri që shihet rrallëherë.
Më ka bërë përshtypje që në ditën e parë që erdhi, si jashtë fushës së lojës për përulësinë që ka, si në fushë për mënyrën se si është i “pafytyrë’. Më kujton shumë Baldanzin, janë gjëra që kanë ai tip lojtarësh që kanë perspektivën e një lloji të veçantë.
Koha do të jetë vendimtare, që të mos djegë etapat. Nëse e kuptoj që koha e tij është nesër, do ta ketë atë kohë. Nëse do të jetë pas 3-4 muajsh, do të jetë pas 3-4 muajsh, por gjithçka ndodh për të mbrojtur djaloshin dhe investimin që është bërë.
Jam i bindur që nuk do t’i nevojitet shumë kohë, pasi është me të vërtetë një djalosh i rëndësishëm. Le ta mbrojmë. Ia kam thënë se që nga minuta e parë që ka vendosur këmbën këtu fillon puna e përmirësimit të mangësive që ka, që kemi veçuar, si dhe të konsolidimit të gjërave që di të bëjë. Këta janë objektivat e tij, nuk duhet të ketë ngarkesa apo gjëra të tjera”, ka theksuar Zanetti.
Lexo gjithashtu
