Skuadra e Tiranës nuk po kalon një moment të mirë në këtë sezon të Superiores. Bardheblutë janë larg pritshmërive dhe tashmë zhgënjimi është prezent. Për të nxjerrë ekipin nga kjo situatë, drejtuesit kanë emëruar në krye të pankinës një emër të njohur që ka kontribuar në futbollin shqiptar, siç është Ardian Mema.
Tekniku i 24-herë kampionëve të Shqipërisë po punon intensivisht për të nxjerrë skuadrën nga "balta", ku sytë janë drejtuar nga janari pasi në merkato priten shumë ndryshime, ku synohet të merret maksimumi i mundshëm nga ky grup aktual që ka në dispozicion. Problemi më i madh i bardhebluve nuk është vetëm çështja e organikës, por ndodhet mbetet brenda shtëpisë. Sa herë që përmendet emri Tirana, sigurisht përbën lajm për çdo medie në Shqipëri. Janë ekipi më i titulluar në vend me histori në kampionatin shqiptar dhe të gjithë kërkojnë të "zhbirilojnë" çdo thashethem të mundshëm në mënyrë që përpos rezultateve negative, të ketë edhe më shumë doza kritikash për ta trazuar ambientin brenda skuadrës.
Por, natyrshëm lind pyetja: Nga i marrin lajmet gazetarët? Këtë s'e di askush, përveç atyre që janë vetë protagonistë. Një problem të tillë e pati ngritur edhe parardhësi i trajnerit Mema, Ze Maria i cili në një konferencë për shtyp deklaroi: "Nuk më pëlqejnë që çdo që ndodh brenda shtëpisë sonë, të nesërmen del jashtë saj".
Të njëjtën gjë theksoi edhe tekniku aktual, Ardian Mema, i cili foli me nota kritike për të gjithë ata që ai drejton, sigurisht duke mos përmendur emra. "Çdo familje ka problemet e saj. Çdo bashkësi ka të meta dhe të mira, por çdo gjë mbetet aty dhe nuk i kalon muret", qe shprehur ai si për të treguar që dikush apo disa tregojnë çdo gjë që ndodh në skuadër.
Në fakt, në klubet europiane ka një shkallë hierarkike, ku fillimisht janë drejtuesit e informacionit, më pas menaxherët që mund të flasin në emër të futbollistëve dhe vështirë që të ashtëquajtura 'lajme' ( të pakonfirmuara) të rrjedhin rëndomtë siç ndodh në vendin tonë. Pretendojmë të luajmë në Europë, por ende jemi shumë larg gjërave elementare, profesionalizmit.
Ndoshta ky është problemi më i madh dhe mungesa e rezultateve pozitive është e keqja më e mirë e mundshme sepse "më tha dhe i thashë", mund të sjellë pasoja të tjera më të rënda. Urojmë dhe shpresojmë që në të ardhmen mediet dhe kushdo të shërbejnë edhe për promovimin e elementëve pozitivë brenda një klubi. Mos t'i bien 'çekanit' në një vend vetëm e vetëm për të trazuar dhe sfilitur një ambient ku janë rritur kampionë dhe emblema të vendit tonë. Sa e vështirë të ndodhë? Shumë e vështirë, sigurisht! Treg "shit-blerje" është edhe ky... /Retin TOKA/
Lexo gjithashtu
