Java e 34-t e Kategorisë Superiore solli një tjetër rezultat konkret pas shpalljes kampion të Partizanit javën e kaluar. Luftëtari siguroi pa luajtur asnjë minutë qëndrimin në elitën e futbollit shqiptar për sezonin e ardhshëm falë 3 pikëve të marra në "tavolinë" ndaj Kamzës 3-0 si dhe barazimit mes Tiranës dhe Kastriotit. Bardheblutë i ndërlikojnë më tepër llogaritë për t'i shpëtuar rënies, pasi ndaj krutanëve mund ta kishin fituar takimin, por çdo gjë shkoi krejtësisht ndryshe. Krutanët qëndrojnë sërish në vendin e nëntë, por me dy pikë diferencë nga Tirana dhe 2 ndeshje të mbetura, ka plot arsye për të besuar te qëndrimi në Superiore.
Kukësi pëson humbjen më të thellë në këtë sezon ndaj Skënderbeut me mungesa, duke u shpartalluar 0-3 në Kamëz. Korçarët rikthehen te fitorja dhe tashmë janë ende në garë për një biletë në Europë. Teuta përfiton nga Partizani, i cili aktivizoi një pjesë të madhe të rezervave në Durrës duke bërë që bregdetarët të fitojnë 2-0 dhe të jenë me një këmbë në Europë.
Në fund, Flamurtari i befason të gjithë duke mposhtur Laçin 1-0. Edhe pse vinin pas 3 humbjeve radhazi, skuadra bëri përshëndetjen e fundit me tifozët në takimin e fundit që luajtën në shtëpi për këtë sezon. Falë sakrificës dhe përkushtimit ndaj fanellës, kuqezinjtë japin shembullin e rrallë që në një kohë kur futbolli funksionin falë financave të forta, kurajoja dhe shpirti luftarak mund të të çojnë larg.
"Newsport" përzgjodhi "Formacionin e javës së 34-t të Kategorisë Superiore" sipas skemës 4-5-1.
Portier
Ilion Lika (Tirana): Gardiani veteran i kampionatit shqiptar ishte më i mirë për bardheblutë në një ditë ku sulmi stonoi totalisht. Në golin e anulluar të Kastriotit, reagoi në kohën e duhur. Arriti t'u hiqte gola të sigurtë krutanëve që shfaqeshin rrezikshëm në kundërsulme. Edhe pse e ardhmja e portës bardheblu është Alessio Abibi, në një ndeshje me rëndësi të madhe dhe përgjegjësi, eksperienca dhe maturia ishte më e nevojshme.
Mbrojtja
Esin Hakaj (Teuta): Futbollisti i durrsakëve është një element kyç i skuadrës së Shkëmbit. Furnizoi me topa repartet e tjera duke i dhënë ekipit mundësi për të shënuar. Përvoja e madhe e ndihmon t'i japë dinamikë lojës së Teutës, e cila ka vuajtur në organizimin në fazën e tretë dhe të kartërt.
Artim Pollozhani (Flamurtari): Veterani ka qenë njëri prej liderëve më të heshtur të këtij kampionati. Edhe në momentin kur të gjithë e mendonin Flamurtarin të falimentuar, qendërmbrojtësi reflekton qetësi dhe besim. Ndaj Laçit të rrezikshëm, vlonjatët u bënë hermetikë në prapavijë duke mbrojtur në mënyrë konservatore golin e Idriz Bathës. Edhe nëse do të largohet në fund të sezonit për shkak të problemeve financiare, ai e ka fituar respektin dhe dashurinë e tifozëve vlonjatë.
Jorgo Pëllumbi (Skënderbeu): Në të ardhmen mund të jetë pjesë shumë e rëndësishme e korçarëve. Trajneri Orges Shehi ka deklaruar se do e ketë si "çekan" mbi kokë duke e këshilluar, pasi ai është shumë i ri dhe i talentuar, por duhet shumë punë për të arritur nivele të larta. Pozicioni i tij është në mesin e fushës, por në qendër të mbrojtjes ndaj Kukësit tregoi se mund ta bëjë shumë mirë atë rol, duke mos treguar për asnjë moment se vjen nga një tjetër repart. Padyshim nga më të mirët në fitoren 0-3 të bardhekuqve ndaj verilindoërve.
Hussein Lukman (Kastrioti): Meriton plotësisht duartrokitjet dhe statusin e heroit për krutanët. Në një ndeshje ku Tirana pati shumë raste për ta fituar, nigeriani u bë "mburoja" e skuadrës së Bledar Devollit. Në minutën e dytë i heq një rast të artë Oduamadit, i cili mund të kishte zhbllokuar sfidën. Në pjesën e dytë bëhet sërish protagonist duke u gjendur në momentin dhe vendin e duhur kur Edon Hasani priste që topi i goditur të shkonte brenda në rrjetë. Në aspektin difensiv, Kastrioti është një ekip kompakt.
Mesfusha
Gerhard Progni (Teuta): Ka vuajtur daljen në lojën e mirë dhe golat, por Teuta e ka rimarrë veten në momentin më vendimtar të sezonit. Fitorja me Skënderbeun i ka bërë me krahë "djemtë e detit" të cilët me dy fitoret e marra ndaj korçarëve dhe kampionëve të rinj të Shqipërisë Partizanit, e shohin veten me një këmbë në Europë. Goli i tij peshon shumë duke kthyer buzëqeshjen dhe optimizmin te durrsakët, të cilët edhe pse zhgënjyen në fazën e tretë dhe në një pjesë të mirë të fazës së fundit, kanë një ekip me shumë vlera.
Sherif Kallaku (Teuta): Nuk njihet si golashënues i rregullt, por në këtë moment të sezonit kur do të mbyllen llogaritë për mbijetesën dhe Europën duhen më tepër golat dhe pikët. Ndaj të kuqve, ai realizoi penalltinë saktë duke hipotekuar 3 pikë të çmuara në garën për Europën. Falë kontrollit të mrekullueshëm të topit dhe fantazisë, të gjithë presin që kampionati jonë të ketë një "organizator" të ri të spikatur, megjithatë ka ende shumë për të dhënë.
Idriz Batha (Flamurtari): Goli i shënuar ndaj Laçit ishte ajo që i vuri "kapakun" performancës së tij në javën e 34 të Superiores. Me një gogitje të saktë me kokë brenda zonës, e dërgoi topin në trekëndëshin e mbrojtur nga Gentian Selmani, duke e lënë këtë të fundit pa asnjë lëvizje. Batha pati edhe të tjera raste për të shënuar golin e dytë personal, por nuk ia doli.
Gjergji Muzaka (Skënderbeu): Muzaka këtë sezon padyshim që ka qenë një ndër lojtarët më të rëndësishëm të Skënderbeut. Në ndeshje të mëdha ai ka qenë gjithmonë aty. Kështu ndodhi edhe përballë Kukësit, ku që në minutën e 3-të i dha avantazhin skuadrës, duke u treguar mjaft i qetë përballë portierit Frashëri.
Marko Pervan (Skënderbeu): Skënderbeu zhvilloi një ndeshje shumë të mirë në Kamëz përballë Kukësit, e vlefshme për javën e 34 të Superiores. 0-3 ishte rezultati dhe goli i tretë mban firmën e kroatit Pervan. Mesfushori u tregua shumë i saktë me topin në mesin e fushës dhe ka gabime, duke ia vështirësuar gjithmonë e më shumë punën kundërshtarit. I ardhur nga stoli, ka zbatuar me përpikmëri detyrat e vendosura nga trajneri Orges Shehi dhe si përfundim është shpërblyer edhe me një gol.
Sulmues
Dejvi Bregu (Skënderbeu): Bregu realizoi një ndër ato gola që në Superiore nuk i shohim shpesh. Një lëvizje me trup dhe driblim shumë i bukur ndaj portierit Frashëri, e dërgoi topin në fundin e rrjetës, duke i dhënë kështu edhe golin e dytë skuadrës së tij. Këtë sezon është golashënuaei i skuadrës me 9 gola dhe nëse nuk do të kishte pësuar atë dëmtim që e mbajti jashtë fushave për më shumë se 2 muaj, atëherë mund të ishte edhe golashënuesi më i mirë i kampionatit.
Trajner
Ilir Daja (Flamurtari): Ndoshta asnjë trajner nuk do ta merrte përsipër shpëtimin e "anijes" Flamurtari në këtë sezon të mallkuar, por Ilir Daja nuk pranoi ta braktiste skuadrën edhe pse i kishte çdo gjë kundër. Ndaj një Laçit, ku askush nuk u jepte shanse për të fituar dhe me kundërshtar në stol Starovën, arriti ta mobilizonte siç duhej ekipin duke mos i lënë hapësira kurbinasve që duan medoemos të luajnë në Europë. Nëse Partizani është kampioni i vërtetë për titull, Flamurtari ka fituar zemrat dhe respektin jo vetëm të tifozëve të qytetit, por të mbarë vendit/NEWSPORT/
Lexo gjithashtu
