Teuta luan nesër në "Niko Dovana" sfidën e parë të turit të dytë Conference League ndaj Inter Escalades. Durrsakët janë favorit në letër dhe kërkojnë të mbyllin llogaritë që në ndeshjen e parë për të udhëtuar të qetë në transfertë. Në krah të trajnerit Martini sot në konferencën për shtyp ishte edhe Sherif Kallaku. Mesfushori ka treguar se ishte vendimi i tij të rikthehej në Durrës, ndërsa ka analizuar edhe kundërshtarin që do të përballë nesër.
Rikthimi te Teuta? "Normalisht që ndihem shumë i lumtur, pasi zgjedhja për t'u rikthyer në Durrës ishte e imja. Shpresoj që të paktën deri në janar, që unë kam kontratën e huazimit, të jap më të mirën dhe të jem me Teutën në vendet e parë, dhe pse jo të kualifikohemi me Interin".
Kundërshtari? "I kemi parë në analiza. Unë i njoh pak më shumë, pasi kam bërë ndeshje kualifikuese me Shqipërinë U21 me Andorrën. Kanë të njëjtën filozofi, rrinë shumë mbrapa dhe janë shumë agresivë. Do mundohemi ta mbyllim që në ndeshjen e parë, pasi më pas do të jetë problem për ndeshjen e kthimit".
Shanset për kualifikim? "Jemi shumë favoritë në letër, por duhet të kemi përqendrim maksimal në fushë. Teuta ka hasur gjithmonë probleme me ekipet e vogla. I kemi studiuar, por nuk mund të them që kemi kapur pika të dobëta. Ata kanë afruar pesë lojtarë të rinj në ekip.
Jemi fokusuar te loja jonë, do ia dalim me sukses nëse realizojmë lojën tonë ashtu siç duhet. Tifozët? Më kishin munguar shumë, shpresoj që nesër, ashtu siç ishin me Sheriffin, të jenë sa më shumë dhe të na mbështesin sa më shumë".
Lexo gjithashtu
