Partizani gjendet në Antalia ku po zhvillon një mini fazë përgatitore. Valentino Murataj është një nga lojtarët më të rëndësishëm të të kuqve, i cili ka dhënë një intervistë për kanalin zyrtar të klubit.
Ai ka treguar se si po shkojnë këto përgatitje, ndërsa është ndalur te emocionet në stadiumin e ri. Në fund ka treguar se bën tifo për Brazilin, skuadër që do të shkojë në finale sipas tij me Argjentinë.
– Si iu duket kjo shkëputje e kampionatit në këtë periudhë?
Kjo shkëputja e kampionatit në këtë periudhë është një risi e re për ne pasi nuk kishte ndodhur asnjëherë. Por, duhet të mësohemi. Ne si skuadër zgjodhëm Antalian këto 10-12 ditë. Këtu kushtet atmosferike dhe stërvitore janë shumë të mira. Shpresojmë t’ia kalojmë sa më mirë dhe pa ndonjë dëmtim.
– Fitorja me Bylisin në stadiumin e ri?
E rëndësishme ishte marrja e 3 pikëve sepse vinim pas dy rezultateve negative. Ndeshja shkoi shumë mirë. Po ashtu kishim dhe mbështetjen e tifozëve. Ishte si të thuash një emocion i veçantë pasi luanim në shtëpinë tonë të re. Jam shumë i lumtur që e nisëm në stadiumin tonë me 3 pikë dhe të vazhdojmë kështu deri në fund.
– Viti i duhur për titullin kampion?
Kjo çështja e titullit kampion dihet sepse është ekip që lufton gjithmonë për trofe. Duhet që gjithmonë lojtarët të japin maksimumin kundrejt çdo trofeu. Shpresoj që ndeshje pas ndeshje ta tregojmë këtë duke fituar dhe të na shkojë sa më mbarë.
– Ekipi që bën tifo dhe cila skuadër e fiton Kupën e Botës?
Unë jam tifoz i Brazilit në Botëror. Kam qenë që i vogël tifoz i fenomenit Ronaldo. Shpresoj të shkojë deri në finale. Besoj se do të jetë në finale me Argjentinë. Shpresoj ta fitojë Brazili.
Loading ...
